"Samkynhneigð er mun algengari hjá knattspyrnukonum"

Viðhorf í garð samkynhneigðra iðkenda í knattspyrnu á Íslandi er almennt séð mjög gott. Þetta eru niðurstöður nýlegs B.A.-verkefnis við hug- og félagsvísindasvið Háskólans á Akureyri.

Elvar Friðriksson og Margrét Lára Viðarsdóttir framkvæmdu rannsóknina, en þau eru bæði afreksmenn í íþróttum. Elvar spilar handbolta með Val og Margrét Lára hefur verið ein besta knattspyrnukona landsins síðustu ár.

Rannsóknin leiddi til að mynda í ljós að rúmlega 93% aðspurðra höfðu ekkert á móti því að hafa samkynhneigðan einstakling í sínu liði. „Viðhorf gagnvart samkynhneigðum kom bara mjög vel út. Við vildum með ritgerðinni sjá hvert viðhorfið væri almennt til þessa minnihlutahóps og niðurstöðurnar komu að flestu leyti mjög vel út," segir Elvar Friðriksson, annar höfundanna, í samtali við Vísi.

Elvar segir dálítinn mun hafa verið á viðhorfunum á milli kynjanna. „Við skoðuðum þetta aðeins út frá kynjunum og það var örlítill munur á þeim. Viðhorf kvennanna var betra gagnvart samkynhneigðum."

Aðspurður að því hvers vegna Elvar teldi þennan mun vera á sagði hann: „Mögulega er þetta vegna þess að það eru fleiri samkynhneigðir einstaklingar í kvennaboltanum en það er erfitt að segja nákvæmlega af hverju."

Þá segir einnig í umræðukafla verkefnisins: „Það er vel þekkt að samkynhneigð er mun algengari hjá knattspyrnukonum en körlum," en höfundar draga þá ályktun að muninn á viðhorfi kynjanna megi að einhverju leyti rekja til þessa.

Flestir halda að aðrir en þeir sjálfir séu fordómafullir

Það vekur líka athygli að þrátt fyrir að rúmlega níu af hverjum tíu hafi svarað því til að þeir hefðu ekkert á móti því að hafa samkynhneigðan einstakling í sínu liði líti stór hluti aðspurðra svo á að almennt séð væri viðhorf gegn samkynhneigðum neikvætt innan knattspyrnunnar. Þannig virðast margir oftúlka viðhorf annarra og líta svo á að aðrir séu fordómafyllri en þeir sjálfir, þrátt fyrir að það virðist ekki vera raunin.