Hjólabrettakappar mótmæla á Ingólfstorgi

Hátt í hundrað hjólabrettakappar og annað stuðningsfólk mótmælir nú á Ingólfstorgi. Ástæðan fyrir mótmælunum er að hjólbrettafólki finnst smám saman verið að bola þeim burt af torginu.

„Við erum hérna til að tala um það sem liggur okkur á hjarta. Okkur líður eins og það sé verið að reka okkur af torginu og við viljum vekja athygli á málstaðnum. Þegar fólk er orðið meðvitað er hægt að fara að vinna í því að finna lausnir á vandamálinu,“ segir Andri Sigurður Haraldsson, skipuleggjandi mótmælanna. 

Andri segir að það hafi komið til átaka í sumar þar sem fólk sé að rífast um plássið á torginu. „Það var fullorðið fólk sem kom hérna og reif gróflega í unga stráka þegar þeir voru að færa stólana til að geta rennt sér. Það er ekki í lagi þegar þetta er komið út í ofbeldi, “ segir Andri og tekur sérstaklega fram að mótmælin séu friðsamleg. „Við viljum enginn átök eða vesen, það kemur ekkert út úr því. Við viljum bara finna lausn á þessu.“

Andri segist fyrst hafa fundið fyrir því að hjólabrettakappar væru ekki ekki velkomnir á reitnum í fyrrasumar. „Síðasta sumar kom grasið og einhverjir stólar og svona. Nú er búið að setja mun meira af stólum og svo var settur stór blómapottur á miðjar tröppurnar sem gerir hjólabrettafólki ómögulegt að leika listir sínar. Þetta eru frægustu og bestu hjólabrettatröppur á Íslandi og ömurlegt að missa þær,“ segir Andri.

Jakob Frímann Magnússon, miðborgarstjóri, sendi frá sér tilkynningu rétt í þessu þar sem hann segir Ingólfstorg vera torg allra borgarbúa; hjólabrettafólks, sóldýrkenda, vetingamanna, íbúa, ferðamanna og annarra sem kjósa að heimsækja torgið. „Þeir sem búa og starfa nálægt torginu hafa lagt sig fram um að fóstra torgið, gera það grösugt og blómlegt að hluta, athvarf sem allir geta heimsótt og notið,“ sagði Jakob í tilkynningunni.

Þá bendir hann á að hjólabrettafólk hafi fengið sérsmíðaða aðstöðu á Hljómalindarreit, Laugalækjarskóla, Laugardal og víðar fyrir stærri og fjölbreyttari viðburði.