"Þeir sem telja þetta eðlilegar aðfarir eiga ekki að starfa í lögreglunni“

„Þetta er ekkert annað en árás,“ skrifar Jón Óðinn Waage, júdókennari og fyrrverandi lögreglumaður, á Facebook-síðu sína um umdeilda handtöku sem gerð var á Laugavegi á dögunum.

„Meðan ég vann í lögreglunni vann ég með mörgum eðalmönnum, mönnum sem að oftar en ekki reyndu að greiða götu ólánsfólks og sýndu því oftar en ekki mikið umburðarlyndi. Þessir menn vissu að í þessu starfi hittir maður oft fyrir fólk í sínu versta ástandi,“ skrifar Jón og bætir því við að nauðsynlegt sé fyrir lögreglumenn að hafa traust fólksins.

„Hvorugur þeirra (lögreglumannanna) fer út úr bílnum til að hafa afskipti af konunni sem að þó var augljós ástæða til. Þess í stað er reynt að stugga henni í burtu með bílnum, það er galin aðferð. Þegar svo konan er komin upp að hlið bílsins þá er henni hrint frá með hurðinni, það er líka galin aðferð. Ökumaðurinn rýkur svo út úr bílnum og ræðst á konuna. Að handtaka manneskju sem varla stendur á fótunum er ekki gert svona.“

Jón segir að nú komi fram lögreglumenn hver á fætur öðrum sem réttlæti aðfarirnar og að það finnist sér ömurlegt.

„Ég hef mikla samúð með starfsaðstæðum og kjörum fyrrum starfsbræðra minna, þess vegna svíður mér þegar störf þeirra og orðspor er skaðað af þeim sjálfum, það er engin þörf á því. Þeir sem telja þetta eðlilegar aðfarir eiga ekki að starfa í lögreglunni. Á mínum starfsferli var nokkrum sinnum hrækt á mig og vinnufélaga mína, við reiddumst alltaf þegar þetta var gert, en aldrei var lífi og limum þess sem hrækti stefnt í voða og ég man aldrei eftir neinum sýkingum af þeim völdum.“