Hefði viljað fara í alfræði

Auður Tinna Aðalbjarnardóttir hefur vakið mikla athygli í Útsvarsliði Reykjavíkur og virðist vita nánast allt. Hún segist eyða miklum tíma í spurningakeppnir, en hún stundar líka nám í lögfræði, situr í stúdentaráði fyrir Röskvu og svo á hún kærasta og nýtur þess að hitta hann á kvöldin.

„Um páskana fer ég alltaf með föðurfjölskyldunni upp í bústað ömmu og afa og við borðum saman lambalæri á laugardagskvöldinu, vöknum svo saman á páskadagsmorgun, förum í páskaeggjaleit og borðum síðan auðvitað páskaeggin. Það er mjög skemmtilegt," segir Auður Tinna Aðalbjarnardóttir spurð um fyrirætlanir sínar um páskahelgina.

Auður Tinna hefur verið í sviðsljósinu í vetur vegna þátttöku sinnar í Útsvarsliði Reykvíkinga en hún hefur reyndar tekið meira og minna þátt í spurningakeppnum síðan hún var unglingur. „Ég byrjaði á þessu þegar ég var í tíunda bekk í Hagaskóla, var síðan í Gettu betur liði MH öll þrjú árin sem ég var þar og þetta er annað árið mitt í Útsvari."

Hvað veldur þessum ofuráhuga á spurningakeppnum? „Ég hef alltaf verið mjög fróðleiksfús og átt auðvelt með að leggja hluti á minnið. Svo byrjaði ég í þessu og finnst þetta bara óskaplega gaman. Bæði að prófa hvað ég veit og eins að kynnast öllu þessu skemmtilega fólki sem hefur verið með mér í liði. Það hefur skapast alveg ótrúlega skemmtileg stemning í kringum þetta í gegnum tíðina og maður fengið mikið af jákvæðri athygli í kjölfarið. Það er bara allt jákvætt við þetta."

Auður Tinna er á öðru ári í lagadeild HÍ, hvað heillaði hana við lögfræðina? „Mér þótti svolítið erfitt að velja eftir menntaskólann. Ég hafði verið á náttúrufræðibraut, málabraut og félagsfræðibraut og ef ég hefði getað valið alfræði hefði hún orðið fyrir valinu, en ég heillaðist af lögfræðinni því það er mjög krefjandi nám auk þess sem ég hef mjög sterka réttlætiskennd og langar að leggja eitthvað af mörkum fyrir samfélagið. Ég lít á lögfræðina sem ákveðið tæki til þess."

Þú ert líka á fullu í stúdentapólitíkinni, ætlarðu kannski út í pólitík að námi loknu? „Kjörtímabilið mitt klárast núna í maí reyndar. Þetta hefur verið ágætt en ég hef fundið að pólitík er stundum pínu skrítin. Stúdentaráð er samt að gera frábæra hluti og er nauðsynlegt til að berjast fyrir réttindum nemenda. Kannski var ég bara of ung, nítján ára þegar ég var kosin. Pólitískur ferill heillar mig ekki í dag allavega en kannski á ég eftir að þroskast upp í að geta tæklað þetta betur."

Fyrir utan námið, pólitíkina og Útsvar, hvað gerirðu þér til skemmtunar? „Ég eyði stórum hluta af mínum frítíma í spurningakeppnir, pólitík og að þjálfa stelpur í borðtennis og reyndar líka keppnislið MH í Gettu betur, en ástæðan fyrir því að ég geri það er að ég fæ svo mikla gleði út úr því að skipuleggja gott starf og uppskera eins og maður sáir. Auðvitað á ég líka fullt af frábærum vinum sem ég nýt þess að læra með og gera eitthvað skemmtilegt með. Svo á ég líka kærasta sem mér finnst mjög gaman að hitta á kvöldin."