Flugvöllurinn í Keflavík 70 ára

Í dag eru liðin sjötíu ár frá því að Keflavíkurflugvöllur var formlega opnaður. Flugvöllurinn var gerður af Bandaríkjaher og gegndi mikilvægu hlutverki í síðari heimsstyrjöldinni.

Völlurinn varð eign Íslendinga að styrjöldinni lokinni og þjónaði sívaxandi flugumferð á flugleiðinni yfir Norður-Atlantshaf sem hófst á styrjaldarárunum. Bandaríkjamenn stóðu straum af kostnaði við rekstur flugvallarins um áratugaskeið og hann var aðalbækistöð bandaríska varnarliðsins á árunum 1951-2006.

Íslendingar hófu ekki að nota flugvöllinn í eigin flugrekstri fyrr en á öndverðum sjöunda áratug síðustu aldar en þar stendur nú mjög blómlegur flugrekstur og miðstöð alþjóðaflugs milli Evrópu og Ameríku.

Nánar er fjallað um afmælið á heimasíðu Isavia þar sem er að finna fjölmargar skemmtilegar myndir frá því þegar völlurinn var byggður.

Ítarlega umfjöllun um tilurð og upphafsár Keflavíkurflugvallar er að finna í bókinni Frá heimsstyrjöld til herverndar - Keflavíkurstöðin 1942-1951 eftir Friðþór Eydal. Höfundurinn vinnur nú að ritun sögu varnarliðsins og Keflavíkurflugvallar á árum kaldastríðsins.