„Laun kennara þurfa að hækka um 20 prósent“

Kennarastéttin hefur dregist aftur úr undanfarin ár og þyrfti tuttugu prósenta launahækkun til að ná fram eðlilegri leiðréttingu, segir formaður kennarasambands Íslands. Ný skýrsla aðila vinnumarkaðsins um launa og efnahagsþróun á Íslandi frá 2006 var kynnt í dag. 

Að samstarfsnefndinni um gerð skýrslunnar standa fern heildarsamtök launafólks annarsvegar og vinnuveitendamegin Samtök atvinnulífsins og , Samband íslenskra sveitarfélaga hinsvegar.

„Hvaða lærdóm dragi þið einna helst af niðurstöðu skýrslunnar?“

„Ég held að við verðum bara að setjast yfir það og skoða þetta. Það koma þarna fram upplýsingar um launaþróun einstakra starfsstétta innan ákveðinna atvinnugreina sem við höfum ekki séð áður og við þurfum bara að greina þetta betur,“ segir Gylfi Arnbjörnsson, forseti ASÍ.

Þorsteinn Víglundsson, framkvæmdastjóri atvinnulífsins segir skýrsluna koma til með að nýtast vel við gerð kjarasamninga á komandi vikum.

„Við fáum hér yfirgripsmikla mynd af launaþróun á liðnum árum annarsvegar  og hinsvegar í fyrsta sinn að horfa mjög vandlega yfir efnahagsumhverfið og efnahagslegar forsendur þeirra kjarasamninga sem við erum að fara inn í. Þetta er mjög mikilvæg vinna og mjög ánægjulegt að sjá að svona vel hafi tekist til. Ég er sannfærður um það að þetta muni leiða okkur til skynsamlegrar niðurstöðu.“

Eitt af því sem fram kemur í skýrslunni er að laun framhaldsskólakennara hafa hækkað minnst allra þeirra hópa sem skoðaðir voru í skýrslunni. Laun framhaldsskólakennara hafa hækkað um 45 prósent frá 2006 á meðan laun félagsmanna innan ASÍ hafa hækkað um 59 prósent. Þetta vill kennarasambandið leiðrétta í komandi kjarasamningum.

„Við þurfum að hækka launin um tuttugu prósent, allavega til að komast í áttina að því sem aðrir sérfræðingar með fimm ára háskólanám að baki eru með og í raun enn hærra ef við ætlum að miða okkur við almenna markaðinn,“ segir Þórður Á. Hjaltested.

Þórður telur að með þjóðarsátt megi ná fram æskilegri leiðréttingu. Hversu hart kennarar muni berjast fyrir bættum kjörum eigi eftir að koma í ljós. Öll umræða um verkfall sé hinsvegar ótímabær.

„Kennarasambandið býr að góðum verkfallssjóði. En það er alveg ljóst að við erum ekki að stefna í verkfall. Við erum að stefna að því að ná kjarasamningum og allar okkar samninganefndir þeirra sjö aðildarfélaga sem eru innan Kennarasambandsins stefna að því, að sjálfsögðu að fara inn í samningana til að semja.“