Fiskifræðingur segir síldina óútreiknanlega

„Það er ekkert hægt að fullyrða um það hvort að síldin gangi aftur í jafn miklum mæli í Kolgrafafjörðinn eins og hún gerði í fyrra,“ segir Guðmundur Óskarsson, fiskifræðingur hjá Hafrannsóknarstofnuninni.

Greint var frá því á vef mbl.is að Bjarni Sigurbjörnsson, bóndi á Eiði við Kolgrafafjörð, sagði að ljóst væri að einhver síld væri komin inn í fjörðinn.

Kolgrafafjörður er næstu fjörður við Grundarfjörð á Snæfellsnesi. „Ég veit ekki hvað síldin gerir en það er mikið af henni í Grundarfirði núna þar sem er verið að veiða hana. Ef síldin hegðar sé svipað og hún hefur gert undanfarin ár má búast við því að hún færi sig innar með landinu, til dæmis inn í Kolgrafafjörð. Hún hefur líka haldið mikið til við sundin í Stykkishólmi undanfarin ár,“ segir Guðmundur.

Yfir Kolgrafafjörð liggur brú og ef síldin fer fyrir innan brúa óttast menn að hún fái ekki nóg súrefni.  Í fyrra drapst síldin vegna súrefnisleysis.

Bóndinn í Kolgrafafirði segist hafa miklar áhyggjur af stöðu mála á svæðinu og aðstæður geti breyst hratt. Ef allt dytti í dúnalogn segir hann að ekkert súrefni verði í firðinum. Björn Steinar Pálmason, bæjarstjóri Grundarfjarðar, segir einnig að menn hafi áhyggjur af stöðunni.

Hafrannsóknarstofnunin hefur verið með mælingu á súrefnisinnihaldinu innan við brúna og segir Guðmundur að súrefnismettunin hafi góð í haust og ekkert óeðlilega lág. 

Guðmundur segir að enn hafi ekki verið tekin ákvörðun um það hvenær þeir fari og mæli magnið en það verði líklega í næstu eða þar næstu viku.

Ekki er hægt að fullyrða um það hvert göngumynstur síldarinnar verður. Að sögn Guðmundar er síldin óútreiknanleg. Það er gert ráð fyrir minna magni í ár en til dæmis í fyrra, þar sem það sé búið að veiða mikið af síldinni en einnig vegna þess að mikið drapst af henni í fyrra.

„Það hafði auðvitað sín áhrif að það dræpist svona mikið magn,“ segir Guðmundur. „Þetta er ekki allur síldarstofninn sem er þarna. Það er líka síld fyrir sunnan sem við munum mæla í næstu viku.“