Sex milljarða skattafsláttur skilar sér ekki til neytenda

Ríflega sex milljarða skattafsláttur ríkisins vegna vistvæns eldsneytis mun ekki skila sér í lægra bensínverði í nánustu framtíð. Þvert á móti gæti eldsneytisverð hækkað. Milljarðarnir sex munu að stærstum hluta fara úr landi til erlendra birgja.

Um áramót taka gildi ný eldsneytislög sem kveða á um að söluaðilar eldsneytis ber að tryggja að minnsta kosti þrjú og hálft prósent orkusölunnar verði af endurnýjanlegum uppruna. Um þar næstu áramót hækkar þessi tala upp í 5 prósent. Lögin eru samkvæmt tilskipun frá Evrópusambandsins en þar er ætlast að 10 prósenta markinu verði náð 2020. Í raun hefði Ísland því ekki þurft að gera neitt í þessum efnum fyrr en eftir sex ár. Ríkið fellur niður olíugjald á endurnýjanlegu eldsneyti og verður af þeim sökum af um 800 milljónum króna á næsta ári og 1100 milljónum króna á hverju ári eftir það. Það mun hinsvegar ekki skila sér til neytenda í formi lægra eldsneytisverðs.

„Nei, við gerum ekki ráð fyrir því að eldsneytisverð muni lækka þar sem að þessi orkugjafar sem þarf að flytja inn, þetta lífræna eldsneyti, það er mun dýrara en það eldsneyti sem við erum að selja í dag,“ segir Guðrún Ragna Garðarsdóttir, framkvæmdastjóri Atlantsolíu.

Undir orð Guðrúnar tekur Jón Ólafur Halldórsson, framkvæmdastjóri sölusviðs hjá Olíuverslun Íslands.

„Nei, að svo komnu sé ég það nú ekki.“

En ef að olíufyrirtækin sjá ekki hagnaðinn af 800 milljón króna afslætti og ekki heldur neytendur, hvert fara þá þessi peningar?

„Til þeirra erlendu birgja sem munu selja okkur lífdísel olíu annarsvegar og ethanól hinsvegar,“ segir Guðrún Ragna.

Eitt af meginmarkmiðum laganna er að draga úr kaupum olíufélaganna á eldsneyti erlendis frá og um leið auka innlenda framleiðslu á þessu sviði. Hvorugt virðist hinsvegar ætla að ganga eftir.

„Því miður er staðan bara sú að innlend framleiðsla komin þangað að við getum nýtt okkur hana og það er töluvert langt í hana.“

Heildarmarkmið ESB er að hlutfall endurnýtanlegrar orku verði komin í 20 prósent eftir sjö ár. Hérlendis er þetta hlutfall nú þegar um 75 prósent. Íslendingar verða því seint sakaðir um að leggja ekki sitt af mörkum til umhverfismála.

Ekki má heldur gleyma að framleiðsla á eldsneyti á ræktarlandi hefur verið harðlega gagnrýnd fyrir að leiða til hækkandi matvælaverðs í heiminum og hungursneyðar. Það er því spurning hvort hægt sé að nota þessa sex milljarða króna á annan og árangursríkari hátt til að draga úr losun koltvísýrings.