Nöfn barnaníðinga birt - „Dómstóll götunnar mættur“

Nöfn og myndir af 50 mönnum sem sagðir eru vera dæmdir barnaníðingar eru birt á nýrri vefsíðu, Stöndum saman. Vefsíðan fór í loftið í vikunni.

Vilhjálmur H. Vilhjálmsson hæstaréttarlögmaður hefur lagt fram kæru fyrir hönd fimm skjólstæðinga sinna sem eiga það sameiginlegt að nöfn þeirra eru birt á síðunni ásamt myndum af þeim. Upphaflega var kæran lögð fram vegna annarrar síðu sem nú hefur verið lokað. Hann telur það fullvíst að sömu aðilar séu á bak við þessa síðu og þá fyrri en hann hafi til dæmis fengið tölvupóst úr sama netfangi vegna þessarar síðu og hinnar. Hin síðan virðist hafa verið einhverskonar bráðabirgðasíða en þessi sé fullgerð.

Vilhjálmur segir að með síðunni sé brotið gegn friðhelgi einkalífs og ákvæðum hegningarlaga um ærumeiðingar og eða brigsl.

Margir þessara manna eiga mál í áfrýjun fyrir Hæstarétti segir Vilhjálmur. „Það er ekki komin endaleg niðurstaða í öllum málunum. Enn á ný er dómstóll götunnar mættur.“

Barnaníð á ekki að líðast á Íslandi

Vefurinn rekur sig alfarið sjálfur segir á síðunni. Þar segir að vefurinn sé rekinn í forvarnarskyni til þess að berjast gegn því að fleiri börn séu misnotuð á einhvern hátt andlega og líkamlega. Vefurinn sé fyrst og fremst upplýsingaveita um forvarnir fyrir foreldra, þar sem hægt sé að nálgast fræðsluefni um hvernig sporna megi gegn því að börn lendi í misnotkun.

Ísland sé lítið samfélag þar sem barnaníð eigi ekki að líðast. Ásamt því að veita upplýsingar á siðunni um forvarnir veitir síðan upplýsingar um þá sem hafa verið dæmdir fyrir barnaníð á Íslandi sem og Íslendinga sem hafa verið dæmdir erlendis fyrir barnaníð.



Mislangir dómar

Á vefsíðunni segir að færslur sem innihalda dóma frá fyrri dómstigum en Hæstarétti verði sendar í geymslu tímabundið þar til endanlegur dómur fellur.

Á síðunni má þó, eins og Vilhjálmur sagði, finna mál þar sem menn hafa ekki verið dæmdir af Hæstarétti. Dómarnir sem mennirnir hafa fengið eru mislangir. Á meðan sumir eru með langa dóma fyrir mjög alvarleg og ítrekuð brot eru aðrir menn með mun styttri dóma.

Á síðunni segir: „Öllum lögfræðilegum hótunum verður öllum tekið fagnandi á netfangið birtumnidinga@gmail.com. Á síðunni segir svo: „En áður en þú eyðir þínum dýrmæta tíma í að skrifa það bréf [eða] tölvupóst þá er best að taka það fram að slíkar hótanir hafa engin áhrif á starf samtakanna,  Færslur sem innihalda dóma frá Hæstarétti eru aldrei fjarlægðar en færslur sem innihalda dóma frá fyrri dómstigum eru settar í geymslu tímabundið hafi máli verið áfrýjað.“