Gríðarlegt umfang barnaníðshrings: "Kaup voru gerð frá Íslandi“

Umfangsmikill barnaníðshringur sem kanadíska lögreglan tilkynnti í gær að hún hefði upprætt, teygði anga sína til Íslands. Kanadískur rannsóknarlögreglumaður segir lögregluyfirvöld hérlendis taka ákvarðanir um hvort brugðist verði við fyrirliggjandi upplýsingum í málinu.

348 voru handteknir í kjölfar rannsóknar sem stóð yfir í þrjú ár og voru tæplega 400 börn frelsuð undan barnaníðingum. Rannsóknin sneri aðallega að fyrirtæki í Toronto sem seldi DVD diska og aðgang að barnaklámi á netinu. Í rannsókninni voru gerð upptæk 45 terabæt af gögnum. Ef maður myndi stafla þeim upp á pappírsformi, yrði stæðan á hæð á við sjö og hálfa Hallgrímskirkju. Því er ljóst að umfang málsins er gríðarlegt.

„Við tókum í raun niður „serverana“ hér í Toronto og gátum þá komist að raun um fjölda viðskiptavina fyrirtækisins og séð hverjir stunduðu viðskipti við þessa netsíðu. Við komumst að því að þeir voru staddir víða um heim og kaup voru meðal annars gerð frá Íslandi,“ segir Paul Krawczyk, yfirmaður kynferðisbrotadeildar lögreglunnar í Toronto.

Rannsóknin var ótrúlega víðfeðm og sláandi er að margir þeirra handteknu höfðu unnið náið með börnum.

„Það eina sem við getum sagt er að við komum frá okkur upplýsingum, það er síðan undir lögregluyfirvöldum á Íslandi komið að ákveða hvort þau geti nýtt sér þær,“ segir Paul.

Hann segir að lögregluyfirvöld hvers lands fái í hendur gögn um kaupendur barnaklámsins og innihald efnisins en gat ekki gefið nánari upplýsingar um aðkomu fólks hérlendis. Málið hefur ekki komið inn á borð lögreglunnar í Reykjavík en þrátt fyrir ítrekaðar tilraunir fengust ekki upplýsingar hjá Ríkislögreglustjóra í dag.

Þetta er ekki í fyrsta sinn sem upp kemst um tengsl Íslendinga við barnaklámhringi og var Ísland til dæmis eitt af 77 löndum viðriðin alþjóðlegan barnaklámhring sem austurríska lögreglan upprætti árið 2007. Þá sagði tölvusérfræðingur í þættinum Málinu fyrr á þessu ári, að myndir af íslenskum börnum væri að finna á erlendum barnaklámsíðum og Íslendingar væru meðal notenda þeirra.