Fernanda dregin út úr höfninni

Slökkvilið höfuðborgarsvæðisins og Landhelgisgæslan eru byrjuð að draga flutningaskipið Fernöndu út úr Hafnarfjarðarhöfn. Ekki er vitað hvert farið verður með skipið.

Fulltrúar Hafrannsóknarstofnunar og Umhverfisstofnunar munu funda strax eftir hádegi hvert best sé að fara með skipið en finna þarf stað þar sem minnsta hættan skapast fari svo að Fernanda sökkvi. Um hundrað tonn af olíu eru um borð í skipinu.

Um tuttugu slökkviliðsmenn taka þátt í slökkvistarfinu auk varðskipsins Þórs.

Sprengjusérfræðingur Landhelgisgæslunnar segir þetta einu erfiðustu aðstæður sem slökkviliðsmenn hafa lent í og heppni að ekki sé um stærra skip að ræða.

Reyk leggur yfir suðurbæinn í Hafnarfirði og hvetur slökkviliðið fólk að loka gluggum svo heimili þeirra fyllist ekki af reyk.