Seldu Maríu mögulega í barnavændi

Lögmaður þeirra Christos Salis og Eleftheriu Dimopoulou, sem grunað er um að hafa rænt stelpunni Maríu, segir skjólstæðinga sína halda því fram að þau hafi ekki rænt Maríu. Heldur ættleiddu þau barnið á hátt sem var ekki löglegur, því líffræðileg móðir hennar hafi ekki getað séð um Maríu. BBC segir frá.

Formaður samtaka sígauna í Farsala í Grikklandi segir Christos og Eleftheriu hafa hugsað betur um Maríu en líffræðilegir foreldrar hennar hefðu nokkurn tíman gert. Leit stendur nú yfir að móðir Maríu. Bróðir Christos segir við BBC að vel hafi verið hugsað um Maríu og hún hafi verið vel alin upp. „Við tókum barnið ekki til að selja hana, við elskum hana mjög mikið.“ Parið er þó grunað um að hafa rænt stelpunni og sent hana til að betla og jafnvel selt hana í barnavændi.

Frá grískum yfirvöldum fengust þær upplýsingar að konan hafi verið með fölsuð skjöl í fórum sínum þar sem fram kom að hún hafi eignast sex börn á tíu mánaða tímabili. María bjó með fleiri en tólf systkinum en sum þeirra eru einnig talinn ekki vera líffræðileg börn Christos og Eleftheriu.