Sagði Mariu litlu eins og sprengju á heimilinu

Grikkinn sem sakaður hefur verið um að hafa rænt litlu ljóshærðu stúlkunni í Grikklandi reyndi í yfirheyrslu í gær að kenna konu sinni um að hafa tekið stúlkuna.

Hann líkti Mariu litlu við sprengju á heimilinu og sagðist aldrei hafa viljað hana. Þau Hristos Salis, 39 ára og Eleftheria Dimopoulou, 40 ára, mættu til réttar í gær þar sem þau voru formlega ákærð fyrir mannrán og skjalafals.

Þau hafa haft Mariu litlu hjá sér í nokkur ár og virðist sem þau hafi notað hana til að betla peninga.

Nágrannar parsins hafa sagt að þau hafi keypt stúlkuna fyrir jafnvirði um 165 þúsund króna.

Parið þverneitar fyrir að hafa rænt stúlkunni og hefur óskað eftir að vera sleppt gegn tryggingu til að geta leitað uppi búlgarska konu sem þau segja að hafi yfirgefið Mariu litlu sem ungabarn í þeirra umsjá.

Mannrán fyrir barn undir 14 ára aldri getur haft í för með sér fangelsisvist í allt að 10 ár í Grikklandi. Parið var ekki ákært fyrir mun alvarlegri sakir, eins og mansal á barni, þar sem þær sakir þóttu ekki nægilega sannaðar.