Einstakt tækifæri til að ná samningum um makrílveiðar

Framkvæmdastjóri LÍÚ vonar að menn beri gæfu til að ná samningum í makríldeilunni í næstu viku. Nú sé einstakt tækifæri til þess vegna aukinna heimilda. Allir verði að gefa eitthvað eftir til að samningar náist en talið er að Evrópusambandið bjóði Íslendingum um 12 prósent af veiðiheimildum á fundi í næstu viku.

Samningafundur í makríldeilunni verður haldinn í Lundúnum á miðvikudag í næstu viku. Talið er að þar muni Evrópusambandið bjóða Íslendingum og Færeyingum hvorum um sig um 12 prósent af veiðiheimildunum, en hingað til hafa sambandið og Norðmenn mest boðið þeim sex til sjö prósent. Kolbeinn Árnason framkvæmdastjóri Landssambands íslenskra útvegsmanna, LÍÚ, segir útvegsmenn frá upphafi lagt áherslu á að samningar náist í deilunni sem staðið hefur í um 7 ár.

„Og teljum mikið fyrir það gefandi  í raun og veru að þessum stofni sé stjórnað eins og öðrum á ábyrgan hátt þannig að við getum horft til nýtingar á honum til lengri tíma,“ segir Kolbeinn.

Vissulega hafi kröfur Íslendinga verið hærri en heyrst hafi að nú sé í boði.

„Ef menn ætla að ná samningum verða allir að sýna ábyrgð og allir að gefa eitthvað eftir. Hvort þetta er eins langt og menn þurfa að fara er eitthvað sem ég get ekki tjáð mig um á þessum tímapunkti,“ segir Kolbeinn.

Hins vegar sé mikilvægt að þeir sem stundi þessar veiðar sýni ábyrgð. Nú sé einstakt tækifæri til að ná samningum þar sem fiskifræðingar leggi til að heildarveiðin fari úr 542 Þúsund tonnum á þessu ári í 890 þúsund tonn á næsta ári.

„Ef við náum ekki samningum núna þegar ráðgjöfin fer upp um 65 prósent og samsvarar nú því sem menn hafa verið að veiða held ég að möguleikar á samningum í framtíðinni verði litlir,“ segir Kolbeinn.

Í Morgunblaðinu í dag segir að Færeyingar muni krefjast meiri veiðiheimilda en Íslendingar hafa krafist hingað til, eða 23ja prósenta verði þeim gert að veiða makrílinn eingöngu innan eigin lögsögu. Kolbeinn segir Íslendinga eiga að gera upp við sig hvað þeir telji sjálfir sanngjarnt.

„Það er hins vegar algerlega skýrt í mínum huga að ef við ætlum að ganga til samninga og klára þetta, þurfa allir sem taka verulegan þátt í veiðunum að vera með. Því það er til lítils fyrir örfáa aðila að tjóðra sig niður við eitthvað ef aðrir sýna ekki sömu ábyrgð. Þannig að ég legg gríðarlega áherslu á það ef samningar nást verði það á sem allra breiðustum grunni og að Færeyingar verði með í því,“ segir Kolbeinn Árnason framkvæmdastjóri LÍÚ.