Telur veiðar á hnúfubökum brot á alþjóðasamþykktum

Í Fréttablaðinu í dag hvetur framkvæmdastjóri Hrefnuveiðimanna til þess að veiðar verði hafnar á hnúfubaki og segir að félagið hefði áhuga á að stunda slíkar veiðar. Leggur hann til að vísindaveiðar verði stundaðar í fimm ár til að afla gagna til veiðiráðgjafar.

Hnúfubökum hefur fjölgað mikið við strendur Íslands. Reglulegar hvalatalningar hófust árið 1987 og þá var stofnmatið um 2000 dýr. Síðan hefur talning farið fram á um sex ára fresti og í síðustu mælingu, árið 2007, var stofnmatið komið í 14 þúsund dýr. Til samanburðar má geta þess að hrefnu- og langreyðarstofnarnir, sem nú eru stundaðar veiðar á, telja um 20 þúsund dýr. Erfitt er að meta áhrifin af fjölgun hnúfubaka á lífríkið. „Við vitum lítið um fæðu hnúfubaks og vistfræðilegt samspil er mjög flókið fyrirbæri  að reikna út svo það er ómögulegt að segja til um það,“ segir Gísli Víkingsson, hvalasérfræðingur hjá Hafrannsóknarstofnun.

Hluti stofnsins heldur til við Ísland árið um kring og fylgir loðnuslóðinni en meginhlutinn fer suður til karabíska hafsins til æxlunar. „Skíðishvalir geta orðið fast að hundrað ára gamlir, verða kynþroska um tíu ára og eiga afkvæmi að jafnaði annað hvert ár,“ segir Gísli. Dýrin verða 30 til 35 tonn að þyngd en magamálið er óþekkt. Langreyðar éta um eitt til eitt og hálft tonn á dag en hnúfubakar eru heldur smærri svo ætla má að þeir borði ívið minna.

Sigursteinn Másson, talsmaður Alþjóðadýraverndunarsjóðsins á Íslandi segir yfirlýsingar hrefnuveiðimanna bera vott um örvæntingu. „Það gengur mjög illa hjá þeim, viðskiptin ganga illa og það er tap á þessum veiðum svo þarna eru þeir að reyna að hugsa sér einhverja leið til að fá ríkisstyrki til að halda áfram að drepa hvali,“ segir Sigursteinn.

Hann segir að hvergi í heiminum séu stundaðar vísinda- eða atvinnuveiðar á hnúfubökum, einungis frumbyggjar á afmörkuðum svæðum fái að veiða þá á grundvelli mörg hundruð eða þúsunda ára reynslu. Hann segir að veiðar á hnúfubökum væru brot á alþjóðasamþykktum Íslands. „Alþjóðahvalveiðiráðið hvílir á samþykktum byggðum á Sameinuðu þjóðunum sem myndi vera mjög alvarlegt mál fyrir Ísland að fara gegn,“ segir Sigursteinn.

Hnúfubakur var síðast veiddur við strendur landsins árið 1954 og alls hafa Íslendingar veitt 6 slík dýr. Nú er spurningin, verða þau fleiri?