Ástþór vill Snowden til Íslands án tafar

„Ef við grípum ekki í taumana og sýnum ekki að við styðjum full mannréttindi, þá getum við bara lokað sjoppunni," segir Ástþór Magnússon ljósmyndari og fyrrverandi forsetaframbjóðandi.

Hann safnar nú undirskriftum frá Íslendingum til að freista þess að veita bandaríska uppljóstrarnum Edward Snowden íslenskan ríkisborgararétt.

Í morgun opnaði hann heimasíðuna Austurvöllur.is þar sem Íslendingar geta skrifað undir og skorað á Alþingi að veita Snowden ferðaskilríki sem gera honum kleift að ferðast til Reykjavíkur án tafar. Áskorunin verður svo send á Alþingi.

„Eins og staðan er orðin í þessu máli þá held ég að Íslendingar eigi að berja í borðið og segja: Við styðjum opið þjóðfélag og mannréttindi. Það eru sjálfsögð mannréttindi að veita þessum manni hæli," segir Ástþór í samtali við fréttastofu.

„Það er ekkert mál fyrir Alþingi Íslendinga að senda þessi skilaboð til umheimsins, sérstaklega í ljósi þess að við eigum elsta þjóðþing í heimi. Við eigum að ganga fram fyrir skjöldu í forystu mannréttinda og friði. Grundvöllurinn fyrir friði er lýðræðislegt og opið samfélag," segir Ástþór í samtali við fréttastofu eftir hádegi.

Í nótt var flugvél bólivíska forsetans neydd til að lenda í Austurríki vegna gruns um að Snowden væri um borð. Portúgölsk og frönsk yfirvöld meinuðu vélinni að fara um lofhelgi sína.

Ástþór segir að með þessu hafi málið tekið nýja stefnu og sýni í raun hversu umsvifamikið það er.

„Það sem Snowden gerði var að afhjúpa grundvallar skipanina í lýðræðislegum þjóðfélögum - hann afhjúpaði lögbrot stjórnvalda í Bandaríkjunum og víðar. Þegar evrópuþjóðir, eins og Frakkar, eru farnir að neita flugvélum að fara yfir lofthelgi og leita í forsetavélum að einverjum manni, þá er farið að ganga miklu lengra en eðlilegt er."

Ástþór er nú staddur á Spáni þar sem hann vinnur að opnun ljósmyndasýningar nú í júlí. Hann hefur verið að taka myndir undanfarin misseri enda lærður ljósmyndari, eins og Vísir fjallaði um í nóvember síðastliðnum.