PSG leggur fram tilboð í Cavani

Yfirmaður knattspyrnumála hjá PSG í Frakklandi hefur staðfest það að félagið hafi lagt fram tilboð í úrúgvæann Edinson Cavani sem leikur með Napoli á Ítalíu.

Cavani var frábær á síðasta tímabili en hann var markahæstur í ítölsku deildinni er lið hans Napoli hafnaði í öðru sæti deildarinnar.

Leikmaðurinn er einn eftirsóttasti knattspyrnumaður heims í dag en lið eins og Real Madrid, Chelsea og Manchester City hafa verið á höttunum eftir honum en verðmiðinn á leikmanninum hefur þótt of hár. Svo virðist því vera að Parísarborg sé líklegasti áfangastaður Cavani.