Helmingur þjóðarinnar vill klára viðræður við ESB

Rétt tæplega helmingur þjóðarinnar vill klára aðildarviðræður við Evrópusambandið samkvæmt nýrri könnun Capacent. Um fjörutíu prósent vilja slíta viðræðum.

Um er að ræða netkönnun sem var unnin af Capacent fyrir samtökin Já Ísland dagana 13. - 24. júní sl. Úrtakið var 1450 manns. Fjöldi varenda var 872 sem þýðir 60 prósenta svarhlutfall.

49,6 prósent sögðust vilja klára viðræðurnar, 41,1 prósent sögðust vilja slíta viðræðunum og 9,3 prósent sögðust hlutlaus.

Ef afstaða er greind eftir búsetu þá vilja 61 prósent Reykvíkinga klára viðræðurnar við ESB, 32 prósent vilja slíta þeim og 7 prósent eru hlutlaus.

Í nágrannasveitarfélögum Reykjavíkur vilja 47 prósent klára viðræðurnar en hlutfallið fer niður í 40 prósent á landsbyggðinni.

Niðurstöður eftir menntun svarenda eru athyglisverðar. Ef skoðuð er afstaða þeirra sem eingöngu hafa grunnskólapróf vill meirihluti eða 48 prósent slíta viðræðunum en 41 prósent vilja klára þær.

Hlutfall þeirra sem vilja klára viðræðurnar hækkar svo eftir því sem fólk hefur meiri menntun. Af þeim sem hafa framhaldsskólapróf vilja 47 prósent ljúka viðræðunum en 44 prósent slíta þeim.

Hlutafall þeirra sem vilja klára viðræðurnar er hæst meðal þeirra sem hafa háskólapróf, en 63 prósent þeirra vilja klára viðræðurnar, en 30 prósent slíta þeim.

Jón Steindór Valdimarsson, formaður samtakanna Já Ísland, segir að niðurstaðan sé skýr.

„Það sem mér finnst athyglisverðast er að þetta er niðurstaða eftir kosningarnar. Það hefur mikið verið rætt um þetta mál. Ríkisstjórnin, utanríkisráðherra og forsetinn. Þeir tala gjarnan um að þetta sé vilji þjóðarinnar að gera þetta svokallaða hlé sem er ekkert annað en slit viðræðna. Þeir eru ekki tala fyrir meirihluta þjóðarinnar. Það er alveg ljóst,“ segir Jón Steindór.

Væri það ótilhlýðilegt af hálfu stjórnarflokkanna að efna ekki loforð um atkvæðagreiðslu um áframhald viðræðna? „Já. Þeir eiga að standa við það sem þeir lofuðu, það er alveg klárt. Þeir töluðu báðir um að gera hlé og halda ekki áfram fyrr en að lokinni þjóðaratkvæðagreiðslu.“

Jón Steindór segir skynsamlegt að halda slíka þjóðaratkvæðagreiðslu samhliða næstu sveitarstjórnarkosningum. Fyrir liggur á Alþingi þingsályktunartillaga um slíkt frá Össuri Skarphéðinssyni, þingmanni Samfylkingarinnar. Óvíst er hvaða stuðnings hún nýtur meðal þingmanna stjórnarflokkanna.