500 milljóna króna samningur Data Market við ProQuest

Fyrirtækið Data Market hefur gert fimm hundruð milljón króna samning við alþjóðlegu gagnamiðlunina ProQuest um sölu á gagnasafni og hugbúnaði fyrirtækisins. Samningurinn opnar margar dyr á Bandaríkjamarkaði, segir rekstrarstjóri Data Market.

Samningurinn er til sjö ára og er verðmæti hans minnst 4,2 milljónir dollara, rétt um 520 milljónir íslenskra króna. Ef ProQuest gengur vel að selja afurðina frá Data Market má reikna með að sú tala hækki umtalsvert.

"ProQuest er fyrirtæki sem hefur undanfarin 75 ár verið að vinna að því að safna saman ýmiskonar, bæði tölfræðigögnum og líka ritrýndum vísindagreinum og í raun fréttagreinum og fleiru slíku. Þeir eru síðan að dreifa þessum gögnum fyrst og fremst inn á háskólamarkaðinn og svo inn á bókasöfn líka", segir Þorsteinn Yngvi Guðmundsson, rekstrarstjóri Data Market.

Þorsteinn segir að sú vara sem Data Market er að selja ProQuest sé tvíþætt.

"Annarsvegar er það gagnasafn sem inniheldur töluvert mikið af svona alþjóðlegum gögnum, þjóðhagsstærðum, lýðupplýsingum og þessháttar. Og hinsvegar er það síðan hugbúnaður frá okkur sem er notaður til að halda utan um gögnin, myndbirta þau og gera fólki í raun kleift að skilja og öðlast eitthvert innsæi í hvað gögnin eru að segja."

DataMarket er íslenskt einkahlutafélag, stofnað fyrir að verða fimm árum. Það þjónustar nokkur íslensk fyrirtæki, þar á meðal Capacent og Seðlabankann. Þorsteinn segir að samningurinn við ProQuest gefi fyrirtækinu mikla möguleika á að stækka og dafna.

"Þetta mun auðvitað líka hjálpa okkur gríðarlega mikið þegar að við höldum áfram að byggja upp sölustarfsemina í Bandaríkjunum þar sem að við erum að leggja okkar áherslur á dreifingu núna. Og ég geri ráð fyrir að þetta muni líka hafa jákvæð áhrif á hugfjárfesta til að taka áframhaldandi þátt í að byggja upp fyrirtækið", segir Þorsteinn.