Persónuvernd krefur Bandaríkjastjórn um upplýsingar vegna njósna

Víðtækar persónunjósnir bandarískra yfirvalda sem uppljóstrarinn Edward Snowden varpaði ljósi á í síðustu viku snerta gjörvalla heimsbyggðina. Persónuverndarstofnanir á Evrópska efnahagssvæðinu hafa sameinast í kröfu sinni um frekari upplýsingar um málið frá Bandaríkjastjórn.

Stór hluti mannkyns er nettengdur og flestir nýta sér þjónustu tæknifyrirtækja á borð við Microsoft, Apple, Facebook og Google. Þær upplýsingar sem Snowden lak til breskra fjölmiðla sýna fram á það hvernig bandaríska leyniþjónustan, í krafti njósnakerfisins Prisma, hafði greiðan aðgang að netþjónum þessara fyrirtækja.

Hörður Helgi Helgason, settur forstjóri Persónuverndar, hefur tekið á móti munnlegum fyrirspurnum vegna málsins. Hann segir málið sýna fram á það hvernig frjálsir einstaklingar ganga í samninga við bandarísk stórfyrirtæki sem síðan fara með persónuupplýsingar eins og þeim og þarlendum yfirvöldum þóknast. Málið sé flókið, enda hafa persónuverndarstofnanir á Evrópska efnahagssvæðinu enga lögsögu í Bandaríkjunum.

„Við höfum verið að fylgjast með málinu í gegnum persónuverndarstofnanir innan Evrópska efnahagssvæðisins. Í öllum þessum ríkjum eru starfræktar slíkar stofnanir í takt við það sem gengur og gerist hér á landi. Þessar stofnanir eru iðulega í miklu samstarfi þegar svona mál koma upp og eiga núna sameiginlega í viðræðum við stjórnvöld í Bandaríkjunum um aðgerðir vegna þessa,“ segir Hörður Helgi.

Hinn einstaki netnotendi kann að upplifa ákveðið vonleysi þegar svo yfirgripsmikið mál skýtur upp kollinum. Hörður Helgi segist hafa orðið var við það á síðustu árum að einstaklingurinn finni friðhelgi sitt skreppa saman.

„Að hluta til er þetta þróun sem við sem þjóðfélag erum sammála um,“ segir Hörður Helgi. „En að einhverju leyti er verið að höggva nærri friðhelgi okkar og taka af okkur stjónina á eigin upplýsingum. Við verðum hiklaust vör við þetta vonleysi sem fylgir þessari þjónustu sem boðið er upp á á netinu.“

„Fólk þarf að kynna sér þessi mál rækilega hvaða upplýsingar það setur á netið, bæði um sjálft sig sem og fjölskyldu sína,“ segir Hörður Helgi að lokum.