Efnahagsbatinn hefði verið fyrr á ferðinni

Steingrímur J. Sigfússon fyrrverandi formaður VG segir að efnahagsbati Íslands hefði verið mun fyrr á ferðinni ef tekist hefði að semja strax í Icesave málinu. Kostirnir við að semja strax hefðu jafnað kostnað þjóðarinnar af fyrsta samningnum.

Steingrímur var gestur í Sprengisandi, þætti Sigurjóns Egilssonar á Bylgjunni í morgun.

Þar var farið yfir störf síðustu ríkisstjórnar, hvað hún gerði vel og hvað betur hefði mátt fara. Icesave málið bar að sjálfsögðu á góma og Steingrímur segist enn þeirrar skoðunar að betra hefði verið að semja strax í málinu. Töfin hefði verið Íslendingum dýrkeypt.

„Og ég er ekki enn búinn að sannfærast um það að það hafi ekki verið jafngóður kostur fyrir Ísland til lengri tíma litið að klára málið fljótt og vel í samningunum um vorið 2009. Við hefðum verið svona níu mánuðum fyrr á ferðinni með endurreisnina. Ein af ástæðum þess að árið 2010 varð Íslendingum svona erfitt er Icesavemálið. Við sátum föst þangað til í lok október 2009, komumst ekkert áfram með aðgerðirnar með AGS, að byggja upp gjaldeyrisforðann og mjög margt fleira sem hékk á þeirri spýtu.

Og þetta tafði okkur síðan árið 2010 og á sinn þátt í því að landsframleiðslan dróst saman um meira en fjögur prósent á því ári. Batinn hefði með öðrum orðum getað orðið umtalsvert fyrr á ferðinni ef þetta mál hefði ekki þvælst svona fyrir okkur.

Þá værum við að tala um stórar tölur fyrir þjóðarbúið í hagvexti og betri afkomu sem væri fljótt að jafna þann reikning sem lægi inn í framtíðinni vegna gamla samningsins. Svo maður tali nú ekki um seinni möguleika á að leysa þetta sem voru enn hagstæðari,“ sagði Steingrímur J. í þættinum.