Hælisleitendur streyma til landsins

170 hælisleitendur bíða nú úrlausnar vegna umsóknar um hæli hér á landi. Langlestir þeirra nýta þjónustu frá Reykjanesbæ en nokkrir sjá þó um eigin framfærslu.

Þriðjudaginn 28. maí síðastliðinn voru hundrað og sjötíu hælisleitendur á Íslandi. Þeir bíða allir úrlausnar á umsókn sinni um hæli. Inn í þessari tölu eru ekki króatarnir tuttugu og sjö sem voru sendir úr landi um hádegi á þriðjudag. Um 110 mál eru til meðferðar hjá Útlendingastofnun. Hjá innanríkisráðuneytinu eru 61 mál hælisleitenda til meðferðar auk 38 mála sem falla undir Dyflinnarsamninginn, alls eru málin þar því 99.

Af þessum 170 hælisleitendum nýta 147 þjónustu frá Reykjanesbæ en 23 sjá um eigin framfærslu. Í mesta lagi 20 þeirra dvelja á Fit hosteli í Njarðvík en samkvæmt upplýsingum frá Reykjanesbæ eru þeir langflestir í íbúðum þar og á höfuðborgarsvæðinu. Langflestir hælisleitenda hér eru einhleypir karlmenn.

Aldrei hafa fleiri sótt um hæli hér á landi og það sem af er þessu ári, en hælisleitendurnir telja orðið hátt í hundrað.

Langflestir þeirra komu frá Króatíu eða 48. Eins og áður segir voru 27 þeirra sendir heim í vikunni, ellefu voru þegar farnir og tíu bíða enn hér á landi eftir lausn sinna mála.

Ekki liggur fyrir hver heildarkostnaður flutningana á króötunum er samkvæmt embætti Ríkislögreglustjóra en áður hefur komið fram að leiga á flugvélinni kostaði um átta milljónir. Þá fengu króatarnir farareyri til að koma sér til síns heima frá Zagreb, hver fullorðinn einstaklingur fékk átta þúsund íslenskar krónur og hvert barn  fjögur þúsund krónur. Tæpur tvöhundruð þúsund kall hefur þá farið í farareyrinn, ótalin eru þá laun þeirra íslensku starfsmanna sem fylgdu króötunum út. En samkvæmt Evrópureglugerð er mælt með því að fylgdarmenn séu að minnsta kosti jafn margir þeim hælisleitendum sem verið er að fylgja út. Fjármagn vegna ferðarinnar kemur frá ríkissjóði.