Varaformenn telja ekki óeðlilegt vera ekki boðið að samningaborðinu

Varaformenn Framsóknarflokksins og Sjálfstæðisflokksins telja ekki óeðlilegt að þeim hafi ekki ennþá verið boðin þátttaka í stjórnarmyndunarviðræðunum, en segja nauðsynlegt að Alþingi breyti vinnubrögðum sínum og að áhersla á samstarf verði aukin. Formenn flokkanna hafa nú fundað í eina viku.

Formenn Framsóknarflokks og Sjálfstæðisflokks, Sigmundur Davíð Gunnlaugsson og Bjarni Benediktsson, hafa fundað utan bæjarmarkanna um helgina og halda því áfram fram yfir hádegi á morgun. Boðað hefur verið til þingflokksfundar hjá Sjálfstæðisflokknum á morgun, þess fyrsta eftir að viðræðurnar hófust.

Borið hefur á gagnrýni á að formennirnir sitji einir við fundarborðið og hafa þingmenn og leiðtogar annarra flokka sagt að ríkisstjórnarmyndun sé ekki tveggja manna verk. Varaformenn Framsóknar og Sjálfstæðisflokks vísa í hefðir innan sinna flokka og segja viðræðurnar í eðlilegu ferli.

„Samkvæmt okkar reglum hjá flokknum þá er formaðurinn með umboðið til stjórnarmyndunarviðræðna og þess vegna er þetta í fullkomlega eðlilegum farvegi,“ sagði Sigurður Ingi Jóhannsson, varaformaður Framsóknarflokksins.

Hanna Birna Kristjánsdóttir, varaformaður Sjálfstæðisflokksins, tekur í svipaðan streng.

„Þetta er alvanalegt ferli. Ég er mjög sátt við það, það ríkir mikill einhugur um það í okkar hópi að svona skuli gera þetta,“ sagið hún um málið.

Hvorki Hanna Birna né Sigurður segjast farin að hugsa út í ráðherraskipan og neita því að hafa augastað á ákveðnum ráðherrastólum.

„Eigum við ekki að láta það koma bara í ljós þegar það gerist. Það á sínar hefðir og reglur innan flokksins,“ sagði Sigurður Ingi.

Aðspurð hvort Hönnu Birnu finnist mikilvægt að Sjálfstæðisflokkurinn fái forsætisráðherrastólinn svaraði hún: „Mér finnst mikilvægt að þeir fái að klára þessar viðræður eins og þeir eru að gera út frá málefnum og treysti þeim til að fara vel með það í lokin,“ sagði Hanna Birna um málið.