Segir kosningalykt af opnun sjóræningjasíðunnar

„Mín tilfinning er sú að þetta sé mjög sérstök tímasetning, svona rétt fyrir kosningar,“ segir Snæbjörn Steingrímsson, framkvæmdastjóri SMÁÍS, samtaka myndréttarhafa á Íslandi, um þau tíðindi að umdeildasta og mest notaðasta skáarskiptasíða veraldar, Thepiratebay, sé nú komin með íslenskt lén. Síðan var áður með sænskt lén.

Það er einn af stofnendum síðunnar, Fredrik Neij, sem er skráður fyrir léninu hér á landi.

Snæbjörn segir skýr dómafordæmi fyrir því að svona síður séu ólöglegar á Íslandi. „Þessi síða er alveg kolólögleg og við höfum dómafordæmi eins og með síðurnar dcc++ og istorerrent,“ útskýrir hann en dómar féllu í Hæstarétti í báðum málum. Snæbjörn telur því ekki miklar líkur á því að sjóræningjasíðan fái að standa lengi óáreitt með íslenskt lén. „Þetta er bara eins skýrt og það verður,“ bætir hann við.

Snæbjörn segist raunar meira undrandi á ákvörðun ISNIC sem útdeilir íslenskum lénum. „Maður hefði haldið að málið væri nokkuð augljóst,“ segir Snæbjörn og bætir við að miðað við þetta sé engar hömlur á því hverskonar síður fái íslensk lén.

Spurður hvernig SMÁÍS ætli að bregðast við málinu svarar Snæbjörn að hann eigi enn eftir að ráðfæra sig við sína menn, „enda kom þetta vægast sagt á óvart í morgun.“

Hann bætir við að það verði alveg örugglega gripið til aðgerða, en líklega muni hann byrja á því að beina vinsamlegum tilmælum til ISNIC um að svipta síðuna léninu í ljósi íslenskra laga um vernd á hugverki. Ef það virkar ekki verða frekari aðgerðir skoðaðar.

„En annars held ég að það hefði enginn opnað þessa síðu fyrir kosningar, enda augljóslega tapað mál. Það er dálítil kosningalykt af þessu,“ segir Snæbjörn að lokum en síðan er nátengd Píratahreyfingunni í Evrópu og var meðal annars í umsjá sænska Pírataflokksins áður en hún fékk íslenskt lén.

Þegar haft var samband við Birgittu Jónsdóttur, eins af forsvarsmönnum Píratanna hér á landi, sagði hún flokkinn hér á landi ekki standa á bak við opnun síðunnar með íslensku léni.

Ekki náðist í forsvarsmenn ISNIC vegna málsins.