Bolatíst á sjö sekúndna fresti

Á áttunda tímanum voru Íslendingar búnir að senda 10 þúsund tíst með merkingunni #boladagur á Twitter. Alls voru send 9.000 tíst með þessari merkingu á Boladeginum á síðasta ári. Því er ljóst að Íslandsmetið í bolun er fallið. Þetta gerir tíst á 7 sekúndna fresti frá því dagurinn var settur klukkan 22.00 í gær. Nefnd Boladags spáir því að fjöldinn muni enda í 15 þúsund miðað við skriðið sem er á tístum nú á lokasprettinum. Telja þeir um að ræða stærsta internetviðburð í sögu Íslands. Bestu tilraunir dagsins til að trufla stórstjörnurnar, hvort sem það tókst eða ekki, er að finna á heimasíðunni Boladagur.is. Grínistinn Eric Idle, kylfingurinn John Daly og Sinbad eru meðal þeirra sem nýlega svöruðu íslenskum bolum. Þá hefur sigurvegara Boladagsins í fyrra, Sigurði Mikael Jónssyni, tekist að fá svör frá öllum fjórum aðalleikurum Seinfeld þáttanna. Vesturbæingurinn Eiríkur Ari Sigríðarson náði athygli sjónvarpsstjörnunnar Pierce Morgan og Alyssa Mylano hrósaði tískulöggunni Sindra Snæ Jenssyni fyrir hversu sætt par hann myndaði með vini sínum. Poppgoðið Rick Astley svaraði útvarpsmanninum Dodda litla og þá ræddi Nick Faldo um íslenskt lambakjöt við kylfinginn Einar Jónsson. Knattspyrnumaðurinn Benoit Assou Ekotto, liðsfélagi Gylfa Þórs Sigurðssonar hjá Tottenham, virðist fylgjast vel með Boladeginum. Reyndar eru öll svörin á sama veginn: lol. Þá hefur MC Hammer heiðrað íslenska boli með nærveru sinni líkt og á Boladeginum í fyrra. Keppni átti upphaflega að ljúka á miðnætti en skilafrestur hefur verið lengdur til eitt í nótt. Hér fyrir neðan er hægt að fylgjast með Íslendingunum á Boladeginum á lokasprettinum.