Mancini segir United búið að vera heppið

Roberto Mancini, knattspyrnustjóri Manchester City er kokhraustur. Hann segir að 15 stiga forysta erkifjendana í Manchester United sé að mestu til komin vegna heppni.

„Þar til nú þá hefur United verið heppið í nánast öllu. Þeir hafa unnið marga leiki á síðustu mínútu, þar á meðal okkur. Þeir áttu líklega skilið að tapa þeim leik en unnu. Ég tel þetta ekki réttláta forystu," segir Mancini.

City mætir Chelsea í mikilvægum leik í dag og takist City ekki að sigra má nánast fara að rita nafn United á bikarinn. „Það er augljóst að þetta verður ekki auðvelt. Við eigum 12 leiki eftir og það gæti gerst. Ég var einu sinni 14 stigum á undan Roma (sem stjóri Inter Milan) og við urðum bara meistarar á síðustu stundu."