Ríkslögreglustjóri hvetur konur til að sækja um yfirmannastöður

„Ég hef lagt ríka áherslu á framgang kvenna innan lögreglunnar á undanförnum árum og hvatt þær til að sækja um stöður, sérstakalega yfirmannastöður,“ segir Haraldur Johannessen ríkislögreglustjóri.

Hann segir að könnun sem embætti ríkislögreglustjóra og Háskóli Íslands stóðu fyrir um vinnumenningu innan lögreglunnar sýni að það séu ákveðnir þættir sem lögreglan verði að leggja meiri áherslu á svo sem að jafna hlut kvenna.

 „Það virðist hins vegar vera einhverskonar ranghugsun innan lögreglunnar sem við þurfum að „konfrontera“ svo starfsmenn innan lögreglunnar átti sig á því að það eru allir jafnir hvort sem það eru karlar eða konur. Þessa hugsun þurfum við að ræða innan okkar raða til að hafa áhrif á breytingar,“ segir Haraldur.

 Í könnuninni eru yfirmenn lögreglunnar gagnrýndir meðal annars fyrir  lélega stjórnunarhæfni, fyrir að beita kynferðislegri áreitni og vera þátttakendur í eineltismálum. Haraldur segir ekki hægt að skipta um yfirmenn því þeir séu flestir skipaðir sem embættismenn til lengri eða skemmri tíma.

Hann segir að það verði að vinna að framtíðarlausnum.  Eitt af því sem menn séu að velta fyrir sér sé að taka þjóðkirkjuna til fyrirmyndar og skipa fagráð  sem tæki á málum er varða kynferðislega áreitni og einelti. 

„Lögreglumenn verða að geta borið það traust til kerfisins að þeir geti komið með ábendingar er varaða kynferðislegt áreiti og einelti upp á yfirborðið,“ segir Haraldur.