Tónlistarspekingurinn lærir tónlistarfræði í Edinborg

„Þetta hefur lengi staðið til og það er kominn tími til að láta verða að því. Það er til heilla fyrir mannkynið að stokka upp í hlutunum reglulega," segir tónlistarspekingurinn Arnar Eggert Thoroddsen, sem heldur utan í framhaldsnám í ágúst.

Arnar Eggert er einn helsti tónlistarspekingur þjóðarinnar og hefur starfað á Morgunblaðinu síðustu tólf ár ásamt því að sitja í dómnefndum í tónlistarkeppnum, stýra þætti um tónlist á Mbl.is, ýmsum útvarpsþáttum og haldið utan um tónleikaröðina Kaffi, kökur & rokk & ról í Edrúhöllinni, svo eitthvað sé nefnt. Hann segir það vera Guðs gjöf að fá tækifæri til að starfa við eitthvað sem hann hefur svona mikinn áhuga á.

Arnar stefnir á nám í tónlistarfræði, eða musicology, við háskólann í Edinborg. Námið tekur eitt ár en líklegast mun fjölskyldan dvelja lengur í Edinborg. „Maður er ekki að rífa upp alla fjölskylduna til þess að stoppa svo bara í eitt ár," segir hann. Stefnan hefur verið sett á framhaldsnám allt frá því að Arnar Eggert kláraði BA gráðu í félagsfræði árið 1999. „Þessi ár á Morgunblaðinu komu bara óvænt inn í og seinkuðu plönunum. Þetta eru samt búin að vera frábær ár og alveg ótrúlega gefandi," segir Arnar Eggert. „Ég var einn af þessum pjökkum sem var alltaf að lesa tónlistarblöð og láta mig dreyma um að verða svona maður sem skrifaði um tónlist í blöðunum," bætir hann við.

Aðspurður segist hann ekki vera búinn að finna góðan arftaka til að taka við kyndlinum þegar hann fer, en að alltaf komi maður í manns stað. „Ég er alls ekkert hræddur við að glata neinu við að fara út heldur er ég þvert á móti mjög spenntur yfir því sem ég er að fara að vinna mér inn," segir Arnar Eggert sem reiknar ekki með því að íslenskt tónlistarlíf fari á hliðina þó hann flytji úr landi. „Ég hvet alla þá sem vettlingi geta valdið til að halda áfram að fjalla um íslenska tónlist, það er svo mikið að gerast og hún á svo mikið inni," segir hann að lokum.

tinnaros@frettabladid.is