450 hommar og lesbíur keppa í sundi í Reykjavík

„Við erum að tala um alveg 800 aukaeistu í bænum yfir þessa daga,“ segir Jón Þór Þorleifsson einn skipuleggjandi mótsins, en um 450 manns alls staðar að úr heiminum eru komnir hingað til lands til að taka þátt, 90% hommar og 10% lesbíur.

Mótið gengur undir nafninu IGLA Championships (International Gay and Lesbian Aquatics) og er heimsmeistaramót samkynhneigðra í sundgreinum. Það hefur verið haldið í tugi ára en þetta er í fyrsta skipti sem það er haldið hérlendis. „Við vorum skoraðir til að halda mótið yfir bjór í Kaupmannahöfn fyrir þremur árum. Við tókum þeirri áskorun og sóttum um að fá að halda það. Við fengum 100% atkvæða á fundinum þar sem ákvörðunin var tekin ári seinna, en það er ekki algengt að það gerist,“ segir Jón Þór.

Undirbúningur mótsins hefur tekið um 2 ár, en það er Íþróttafélagið Styrmir sem stendur á bak við það og fer Jón Þór þar í forsvari ásamt Bjarna Snæbjörnssyni. Íþróttafélagið Styrmir stílar inn á samkynhneigða en er fordómalaust félag og gagnkynhneigt fólk stundar einnig íþróttir þar, til dæmis er allt íslenska liðið í vatnspóló skipað gagnkynhneigðum strákum. Auk sundsambands Styrmis hafa Reykjavíkurborg og Menntamálaráðuneytið komið að mótinu og styrkt það.

„Þetta er líka alveg frábært fyrir hagkerfið því það er ótrúlega mikið af fólki að koma til landsins, margir sem koma fyrr eða dvelja lengur, og öll skilja þau eftir pening í landinu,“ segir Jón Þór.

Keppt verður í hefðbundnu sundi, víðavangssundi, sundknattleik, dýfingum og samhæfðri sundfimi og fer mótið fram í Laugardalslauginni og Sundhöllinni. Öllum er velkomið að koma og fylgjast með og er aðgangur ókeypis. Einnig verður boðið upp á ókeypis námskeið í samhæfðri sundfimi í Sundhöllinni sem allir geta skráð sig á svo framarlega sem þeir séu eldri en 16 ára og ná að synda 100 metra án þess að stoppa.

„Ég prufaði einu sinni samhæfða sundfimi og þetta er alveg brjálæðislega erfitt, ég var næstum því drukknaður,“ segir Jón Þór. Nánari upplýsingar og dagskrá má nálgast á heimasíðunni Igla2012.org.

tinnaros@frettabladid.is