Vildi ekki flytja til Los Angeles

Sænska leikkonan Noomi Rapace veitti New York Times Magazine viðtal fyrir stuttu og ræðir meðal annars samband sitt og fyrrum eiginmanns síns, æskuárin á Íslandi og flutningana til Los Angeles.

Rapace segist hafa verið treg til að flytja til Hollywood og hafi óttast að henni mundi ekki líða vel í borginni. „Ég hélt að LA snerist aðeins um stórstjörnur, rauða dregla og stór brjóst. Ég sagði við umboðsmann minn að ég vildi ekki flytja til Hollywood og frekar einbeita mér að alvöru kvikmyndum. Hún spurði mig á móti hvaða fólki ég dáðist helst að í kvikmyndabransanum og ég nefndi nokkur nöfn og þá sagði hún: „Þetta fólk býr allt í LA.“ Það var þó aldrei draumur minn að flytjast þangað því mig langar frekar að takast á við erfið og skrítin hlutverk,“ sagði leikkonan.

Rapace fer með eitt aðalhlutverkanna í stórmyndinni Prometheus sem er leikstýrt af Ridley Scott og var að hluta til tekin upp hér á landi.