Slegist um bílnúmerið Barbie

„Ég og vinkona mín töluðum alltaf um að fá okkur bleikar bjöllur með einkanúmerinu Barbie því við vorum lágvaxnar og með stutt dökkt hár sem er andstæðan við Barbie," segir Harpa Gunnarsdóttir, sem er með einkanúmerið Barbie á bílnum sínum.

Á mánudag greindi Fréttablaðið frá Ingibjörgu Austmann Þorbjörnsdóttur sem er með hið keimlíka einkanúmer Barbí. Í tilviki Hörpu er um kaldhæðni að ræða, en númerið hefur engu að síður vakið eftirtekt. „Númerinu var stolið í þrígang sumarið 2006 í miðbæ Reykjavíkur," segir Harpa. Síðustu sex ár hefur hún verið kennd við Barbie og bloggaði meira að segja undir nafninu Harpa Barbie um stund. Stuldurinn er ekki eina athyglin sem Harpa hefur upplifað vegna númersins því hún hefur fengið nokkur kauptilboð.

„Ég fékk einu sinni tilboð upp á hundrað þúsund fyrir það," segir Harpa sem hefur síðan þá hafnað fleiri tilboðum, meðal annars frá Ingibjörgu, sem sætti sig þó við númerið Barbí að lokum. „Hún bauð ekki nægilega mikið í númerið," segir Harpa sem myndi íhuga veglegra tilboð en hundrað þúsund krónur.

Þó að draumurinn um bílnúmerið Barbie hafi orðið að veruleika varð ekkert úr bjöllukaupunum. „Ég fékk mér svaðalegan kolsvartan BMW með svörtum rúðum allan hringinn í staðinn og keypti mér númerið á þann bíl. Ég keypti ekki bjöllu því það var eins og að keyra baðkar á hjólum," segir hún.

Þessa dagana bíður hún eftir alvöru Barbie-bifreiðinni sinni en kærastinn hennar rekur sprautuverkstæði og gerir upp bíl handa henni í hjáverkum. „Hann verður bleikur með blómum," segir Harpa og bætir við að kærastinn hafi lofað að fá sér bílnúmerið Ken. -hþt