700 myndir borist á RIFF

Fleiri en 700 myndir hafa borist á alþjóðlegu kvikmyndahátíðina í Reykjavík sem hefst í lok september.

„Þegar hafa um 700 myndir verið sendar inn, en í fyrra voru þær um 500. Íslenskir kvikmyndagerðarmenn hafa þó enn smá tíma en þar sem þeir geta verið svo seinir var umsóknarfrestur fyrir þá framlengdur út þessa viku,“ segir Atli Bollason, kynningarfulltrúi og ritstjóri Reykjavík Film Festival, eða RIFF.

RIFF-hátíðin er langstærsta kvikmyndahátíðin hérlendis og verður hún haldin í sjötta skipti dagana 27. september til 7. október næstkomandi. „Það er um tuttugu manna hópur sem situr við að kemba það sem er sent inn og velur úr um eitt hundrað myndir sem komast á hátíðina. Myndirnar eru jafn misjafnar og þær eru margar og af mismiklum gæðum, en það er gaman að sjá hvað leynast alltaf margir gullmolar í hrúgunni,“ segir Atli og bætir við að töluvert meira sé sent inn af erlendum myndum en íslenskum.

Stærstu verðlaun hátíðarinnar eru Gyllti lundinn og eru þau veitt fyrir bestu myndina, en aðeins þeir sem eru að senda inn sína fyrstu eða aðra mynd geta hlotið þau. „Aðalverðlaunin hjá okkur fara til nýliða, sem er öfugt við það hvernig þetta er í flestum öðrum keppnum þar sem þeir eru oftast hafðir í aukahlutverki,“ segir Atli. Í fyrra mættu um 30.000 manns á hátíðina og býst Atli ekki við minni aðsókn í ár. „Hátíðin er mjög vinsæl meðal Íslendinga og svo fylgja erlendir framleiðendur myndum sínum oft auk þess sem hellingur af blaðamönnum og bransafólki kemur til landsins til að vera viðstatt,“ segir hann en meðal þeirra sem hafa þegar staðfest komu sína er Marjane Satrapi, leikstýra og höfundur Persepolis- trs