Inga kvaddi Nasa með tárum

„Þetta var fullkomið lokakvöld. Sérstaklega var ég ánægð með að Palli skyldi hafa átt síðasta sönginn í húsinu en það var mín ósk,“ segir Inga, framkvæmdastjóri og eigandi skemmtistaðarins Nasa, um Eurovisionpartý Páls Óskars þar síðastliðið laugardagskvöld.

Ballið var síðasti viðburðurinn sem haldinn verður á Nasa, en til stendur að reisa hótel á lóðinni. Páll Óskar endaði frábært og tilfinningaþrungið kvöldið með því að syngja Abba lagið Thank you for the Music án undirspils. Inga stóð með honum á sviðinu og gat ekki tára bundist.

Starfsfólk Nasa kom henni svo í opna skjöldu með gjöfum og skemmtilegri uppákomu. „Ég er algjör dramadrottning og mikið í mun að allt sé í lagi gagnvart lögreglunni og slökkviliðinu. Starfsfólkið fékk þá því í lið með sér og þeir komu á mitt ball og hótuðu að henda öllum út. Ég byrjaði að æsa mig við þá og var við það að fá taugaáfall þegar þeir dróu mig upp á svið, en ég ætlaði ekki að trúa því að þeir ætluðu að handtaka mig uppi á sviði fyrir framan alla. Þá hvíslaði einn þeirra að mér að þetta væri bara djók ef ég væri ekki búin að átta mig á því ennþá, sem ég var ekki búin að gera,“ rifjar Inga upp hlæjandi.

Þegar Fréttablaðið náði tali af henni var hún á fullu að pakka staðnum saman. „Þetta er ótrúlega erfitt en það er ekkert búið fyrr en það er búið. Nú þarf fólk bara að láta í sér heyra og sýna að það sé ósátt við lokunina,“ segir hún. Hún reynir þó að horfa bjartsýn fram á veginn.

„Síðustu 10 ár hefur líf mitt snúist um Nasa en ég býst við að þegar einar dyr lokist opnist yfirleitt aðrar.“ -trs