Óþægilegt á nærbuxunum

Zac Efron segir að það hafi verið krefjandi að leika í myndinni The Paperboy og að hlutverkið sé öðruvísi en fólk eigi að venjast frá honum.

Hinn 24 ára leikari er þekktastur fyrir High School Musical-myndirnar. Í dramanu The Paperboy leikur hann á móti Nicole Kidman og Matthew McConaughey og viðurkennir að það hafi verið gaman að sýna á sér nýja hlið. „Ég er mjög ánægður með það sem ég hef gert hingað til en þetta var nýtt fyrir mér og ótrúlega gefandi. Þetta var draumur í dós og vonandi get ég haldið áfram á þessari braut,“ sagði Efron á Cannes-hátíðinni.

Í myndinni er hann mikið á nærbuxunum og viðurkennir að það hafi verið óþægilegt að taka upp þau atriði. „Ég held að mér hafi ekkert átt að líða vel. Persónan er að læra inn á lífið og tilveruna og það getur verið mjög óþægilegt en það er líka mjög spennandi.“

Kidman hafði gaman af því að fækka fötum í myndinni og segir að það hafi verið áskorun.

„Sem leikkona var ég búin að leita í nokkurn tíma að einhverju hráu og hættulegu eins og þessu.“ Leikstjóri myndarinnar er Lee Daniels sem síðast sendi frá sér hina vel heppnuðu Precious.