Styrkja UN Women

Tónleikar til styrktar UN Women fara fram á Gauki á Stöng í kvöld. Það er vefverslunin Gogoyoko sem skipuleggur tónleikana, sem eru þeir fyrstu í röð tónleika sem haldnir verða ársfjórðungslega til styrktar góðu málefni.

Hljómsveitirnar Mammút, Tilbury, Snorri Helgason, Elín Ey, Muck og Christopher Wyatt-Scott koma fram á tónleikunum í kvöld og segist Inga Dóra Pétursdóttir, framkvæmdastjóri hjá UN Women, þakklát fyrir stuðninginn. „Við erum mjög þakklát Gogoyoko, tónleikastaðnum og tónlistarfólkinu fyrir stuðninginn og þá vinnu sem þarf til að hrinda tónleikum sem þessum í framkvæmd."

UN Women eru samtök innan Sameinuðu þjóðanna sem vinna að jafnrétti kynjanna og eflingu kvenna. Samtökin hafa þau markmið að stöðva kynbundið ofbeldi og bæta aðstöðu kvenna um heim allan og að sögn Ingu Dóru hefur stuðningur við UN Women á Íslandi aukist verulega eftir kreppu. „Sú tilhneiging fólks að draga saman fjárútlát til góðgerðamála þegar kreppir að hefur ekki átt sér stað hér. Hjá okkur hefur stuðningur aukist töluvert eftir kreppu og við gátum því aukið framlag okkar um 140 prósent og okkur þykir ótrúlega vænt um það," segir Inga Dóra sem hyggst mæta á tónleikana í kvöld ásamt öðrum starfsmönnum UN Women. Tónleikarnir hefjast klukkan 22.00 og er miðaverð 1.000 krónur.-sm