Dramatísk helgi í bíóhúsunum

Gelgjutryllirinn Zac Efron sýnir á sér nýjar hliðar í dramamyndinni The Lucky One sem var frumsýnd í gær. Myndin fjallar um hermann sem er fullviss um að mynd af konu sem hann fann í miðri sprengjuárás sé happagripurinn hans og ástæða þess að hann hafi einn lifað af ýmsar árásir í stríðinu. Þegar hann kemur heim leggst hann í það að finna konuna á myndinni og verða hluti af lífi hennar.

Myndin Tyrannosaur segir áhrifamikla sögu af ekklinum Jósef sem er á slæmum stað í lífinu eftir að hafa misst konu sína og þráir að bæta líf sitt. Þegar hann hittir Hönnu virðist allt stefna í rétta átt en þrúgandi leyndarmál hennar gæti sett strik í reikninginn. Þetta er fyrsta myndin sem hinn þekkti breski leikari Paddy Considine skrifar og leikstýrir.

Önnur dramamynd sem frumsýnd er um helgina er myndin Applause. Hún segir frá lífi leikkonunnar Thea Barfoed sem reynir að koma lífi sínu á réttan kjöl eftir að hafa lent í ýmsum erfiðleikum og þar á meðal misst forræði yfir börnum sínum. Prímadonnan innra með henni gerir henni þó erfitt fyrir að glíma við hversdagslega tilveru. Það er Paprika Steen sem fer með hlutverk Barfoed.

Gamanmyndin Salmon Fishing in the Yemen segir frá vel stæðum arabafursta sem vill koma á fót laxveiðum í miðri eyðimörk. Ewan McGregor og Emily Blunt fara með aðalhlutverk í myndinni. - trs