Bölvun hvílir á hlutverki Galifianakis

Gamanleikarinn Zach Galifianakis er talinn líklegur til að fara með hlutverk Ignatius Jacques Reilly í kvikmynd sem byggð verður á verki eftir rithöfundinn John Kennedy Toole. Nokkrir leikarar og leikstjórar hafa áður reynt að gera A Confederacy Of Dunces að kvikmynd, án árangurs.

Leikstjórinn Harold Ramis hóf undirbúning að kvikmynd byggðri á sögunni árið 1982 og átti John Belushi að fara með hlutverk aðalpersónunnar, Ignatius Jacques Reilly, en sviplegt fráfall Belushi gerði þau áform að engu. Einhverjum árum síðar voru John Candy og Chris Farley orðaðir við hlutverkið, en þeir létust báðir áður en verkefnið komst á flug. Vegna þessa var bölvun sögð fylgja hlutverki Ignatius Jacques Reilly.

Framleiðslufyrirtækið Paramount á einnig í samningaviðræðum við leikstjórann James Bobin og handritshöfundinn Phil Johnston um verkefnið. A Confederacy Of Dunces segir frá hinum þrítuga Ignatius Jacques Reilly sem neyðist til þess að flytja að heiman og finna sér vinnu og gengur það nokkuð brösuglega.

Ignatius hefur verið líkt við nútíma Don Quixote og honum lýst sem sérvitrum en lötum hugsjónamanni og ætti Galifianakis líklega ekki í neinum vandræðum með að túlka letiblóðið.