Væntingarnar eru miklar

Hljómsveitin Beach House er mætt með sína fjórðu plötu, Bloom. Hún telst vera rökrétt framhald af hinni vel heppnuðu Teen Dream.

Fjórða plata bandaríska draumpoppsdúettsins Beach House kemur út eftir helgi. Íslenskir tónlistarunnendur sem sáu hljómsveitina spila í Listasafni Reykjavíkur á Airwaves-hátíðinni í fyrra munu vafalítið gefa plötunni gaum, enda tókust tónleikarnir einkar vel. Þar sveif seiðandi rödd söngkonunnar Victoriu Legrand yfir vötnum í bland við draumkennda og afslappandi tóna Alex Scally.

Beach House var stofnuð árið 2005. Scally spilar á gítar og hljómborð og Legrand syngur og spilar á orgel. Hann er frá Baltimore en hún er fædd í Frakklandi. „Við hittumst í Baltimore. Ég er þaðan en Victoria flutti þangað, eiginlega til að spila tónlist. Eitt leiddi af öðru. Ætli örlögin hafi ekki verið að verki,“ sagði Scally í viðtali við Fréttablaðið í fyrra. Nýi gripurinn nefnist Bloom og telst hún vera rökrétt framhald af Teen Dream sem kom út fyrir tveimur árum við frábærar undirtektir gagnrýnenda. Hún lenti ofarlega á mörgum árslistum og eru væntingarnar því miklar í þetta sinn. Fjórar stjörnur í tímaritinu Q gefa til kynna að hljómsveitin er enn í góðum gír.

Bloom, sem kemur út á vegum Sub Pop, var tekin upp í bænum Tornillo í Texas seint á síðasta ári en hljómjöfnuð í New York-borg. Legrand og Scally önnuðust upptökustjórn ásamt Chris Coady, sem vann einnig með þeim að Teen Dream. Hann þykir einkar lunkinn eins og ferilskrá hans ber vott um því hann hefur starfað með Yeah Yeah Yeahs, TV on the Radio og nú síðast rokkurunum hressilegu í Smith Westerns.

Lögin á Bloom, þar á meðal fyrsta smáskífulagið Myth, voru mestmegnis samin þegar hljómsveitin var á tveggja ára tónleikaferð um heiminn en þegar heim var komið til Baltimore voru þau fínpússuð fyrir upptökur. „Þessar lagasmíðar eru bara eðlilegt framhald fyrir okkur. Við förum í tónleikaferðir og semjum síðan lög. Það er bara það sem við gerum,“ sagði Scally, spurður út í væntanlega plötu.

Beach House er í tónleikaferð um Bandaríkin um þessar mundir en ferðast svo með draumpoppið sitt til Evrópu áður en förinni verður aftur heitið vestur um haf í byrjun júlí. freyr@frettabladid.is