Óttast farsímaleysi

Nomophobia kallast það er fólk hræðist að vera úr símasambandi við aðra og samkvæmt nýrri rannsókn eru um 66 prósent Breta haldnir þessari fælni.

Um þúsund manns tóku þátt í rannsókninni sem var stýrt af SecurEnvoy í Bretlandi og voru niðurstöður hennar þær að 66 prósent Breta óttist það að vera símalaus. Um 41 prósent þeirra er tóku þátt í könnuninni sögðust jafnframt eiga fleiri en einn farsíma. Rannsóknin leiddi í ljós að þetta fólk þjáðist af nomophobia sem er mikill ótti við það að vera ekki í símasambandi við annað fólk. Fyrir fjórum árum síðan voru 53 prósent Breta haldnir sömu fælni.

Fleiri konur en karlar þjáðust af þessum ótta, í ljós kom að 70 prósent kvenna óttuðust símaleysi en 61 prósent karla. Þeir voru þó líklegri til að eiga tvo farsíma.