Of Monsters hefur selt yfir hundrað þúsund eintök

Of Monsters and Men hefur selt sína fyrstu plötu, My Head Is an Animal, samanlagt í rúmum eitt hundrað þúsund eintökum. Þar af hefur hún selst í 95 þúsund eintökum í Bandaríkjunum og Kanada, samkvæmt upplýsingum frá Nielsen Soundscan sem heldur utan um plötusölu vestanhafs.

Þessar háu tölur koma ekki á óvart því platan fór beint í sjötta sæti bandaríska Billboard-listans sem er besti árangur íslensks flytjanda frá upphafi. Hér heima hefur hún selst í ellefu þúsund eintökum.

Aðspurður telur Ásmundur Jónsson, formaður Félags hljómplötuútgefenda, að töluvert meiri sala á plötunni sé framundan. „Þau eru bara rétt að byrja. Þessi plata á örugglega eftir að seljast helling í viðbót.“

Hann segir góðan árangur Of Monsters and Men í Ameríku rosalega ánægjulegan. „Það hefur verið beðið í svolítinn tíma eftir næsta listamanni frá Íslandi, að hann nái verulegum árangri úti. Það virðast bara vera þau í dag og það er alveg frábært,“ segir hann. „Það sem gerist samhliða svona árangri er að hann skapar athygli og opnar dyr fyrir aðra listamenn frá Íslandi. Það sem skiptir líka máli er að velgengnin hefst í Ameríku en ekki í gegnum Bretland eða Evrópu. Það er eitthvað nýtt í því.“

Útgáfa My Head Is an Animal, sem kom út vestanhafs í byrjun apríl, er örlítið frábrugðin þeirri sem kom út hér á landi í fyrra. Upptökur á endurbættri útgáfu plötunnar fóru fram í Reykjavík með aðstoð upptökustjórans Jacquire King sem hefur unnið með Kings of Leon. Þar eru tvö ný lög sem eru ekki á íslensku útgáfunni en einnig vantar á hana tvö lög sem voru á þeirri íslensku.

Platan hefur fengið góða dóma, þar á meðal þrjár stjörnur í vefútgáfu bandaríska tímaritsins Rolling Stone. Smáskífulagið Little Talks fær einnig fína dóma á vefsíðu Billboard. „Sakleysislegir og grípandi tónarnir segja meira en mörg orð. Undir röddunum hljómar epísk gleði með skemmtilegum blásturhljóðfærum og handaklappi í takt við órafmagnað gítarspil og kraftmikinn trommuleik,“ skrifar gagnrýnandinn. freyr@frettabladid.is