Springsteen fær þriðjung

Bruce Springsteen fær í laun næstum þriðjung af því sem kostar að halda Hróarskelduhátíðina í Danmörku fyrir að stíga þar á svið í fyrsta sinn. Þetta kemur fram í blaðinu Berlinske Tidende.

Stjórinn, eins og hann er stundum kallaður, fær um 250 milljónir króna fyrir að spila á hátíðinni en kostnaðaráætlun hennar hljóðar upp á tæpar 900 milljónir. Upphæðin er álíka há og Prince fékk fyrir að spila á Hróarskeldu fyrir tveimur árum. Rikke Øxner, stjórnandi hátíðarinnar, vildi ekki staðfesta upphæðina en er sannfærður um að Springsteen verði hverrar krónu virði.