Fólk byrjað að þekkja salsadans frá salsasósu

Salsa Iceland hefur komið salsadansi á kortið á Íslandi. Eigendur Salsa Iceland, ásamt fleirum, standa fyrir dansskemmtun í dag í tilefni af Alþjóðlega dansdeginum á morgun.

„Þegar ég byrjaði fyrst að röfla um salsa árið 2003 tengdu flestir það bara við salsasósu. Það hefur þó mikið vatn runnið til sjávar síðan þá og í dag þekkja flestir salsadans,“ segir Edda Blöndal, sjúkraþjálfari, salsafíkill og einn eigenda Salsa Iceland.

Edda stofnaði Salsa Iceland eftir að hafa smitast af salsa bakteríunni í karate-keppnisferðalögum erlendis. „Árið 2006 byrjaði þetta fyrir alvöru hjá okkur og við fórum að kenna sjálf,“ segir Edda, en Salsa Iceland er í dag með 16 kennara á sínum snærum og kennir salsa á sex stigum auk annarra latíndansa. Á fimmtudagskvöldum bjóða þau upp á ókeypis salsakvöld með ókeypis prufutíma fyrir byrjendur á Thorvaldsen og þar hittist fólk og dansar saman fram eftir kvöldi. „Það er svo gaman við þetta að það er fólk úr öllum stéttum þjóðfélagsins og á öllum aldri að mæta,“ segir Edda og bætir við að dansinn sé aðgengilegur hverjum sem er. „Fæstir sem koma á námskeið eru einhverjir danssérfræðingar og það er ekki nauðsynlegt að mæta í pörum,“ segir hún.

Aðsókn herra hefur aukist mjög að undanförnu og að sögn Eddu er alltaf passað upp á kynjahlutföll á námskeiðunum „Við bjóðum til dæmis herrum að endurtaka námskeið sem þeir hafa tekið, sér að kostnaðarlausu. Þannig hjálpa þeir okkur með kynjahlutföllin og fá jafnframt tækifæri til að æfa sig betur, enda ekki lítið verkefni að læra að stýra þessum íslensku konum,“ segir Edda og hlær.

Í dag, laugardag, mun Salsa Iceland standa fyrir dansdegi í stúdíói sínu að Grensásvegi 12a í samstarfi við Háskóladansinn, Tangóævintýrafélagið, Lindy Ravers og Salsa Mafíuna. Dagurinn er haldinn í tilefni Alþjóðlega dansdagsins sem er 29. apríl ár hvert. „Við verðum með dagskrá í gangi allan daginn sem endar svo með hörkuballi um kvöldið,“ segir Edda og bætir við að þátttaka sé fólki að kostnaðarlausu. Allar nánari upplýsingar um daginn og Salsa Iceland má finna á heimasíðu þeirra, www.salsaiceland.is

tinnaros@frettabladid.is