Heldur námskeið í Eurovision

„Þetta er bæði hugsað fyrir fólk sem hefur kynnt sér keppnina vel og líka þá sem langar bara að læra aðeins meira,“ segir Reynir Þór Eggertsson, Eurovision-spekúlant, um Eurovision-námskeið sem hann er að fara af stað með hjá Mími símenntun nú síðar í mánuðinum.

Námskeiðið hefst miðvikudaginn 25. apríl og er tvö kvöld. „Á fyrra kvöldinu ætlum við að fara yfir fyrstu 41 ár keppninnar, eða þar til símakerfið var tekið upp árið 1997. Á seinna kvöldinu skoðum við svo keppnirnar frá 1997 til dagsins í dag. Áhrif símakosningar, stækkun til austurs og fleira,“ segir Reynir Þór.

Reynir segir tilgang námskeiðsins vera að fræða fólk um keppnina. „Það tala til dæmis margir um að Austur-Evrópubúar kjósi alltaf hver annan. Á þessum fimmtán keppnum frá því að símakosningin var tekin upp hefur sama land þó aldrei unnið tvisvar og níu lönd hafa sigrað í fyrsta skipti. Á árunum fimmtán þar á undan unnu Írar hins vegar fimm sinnum, Svíar tvisvar og Norðmenn tvisvar,“ segir Reynir Þór. Það er því greinilegt að almenningur í Evrópu er ekki einungis að kjósa nágranna sína.

Þetta er í fyrsta skipti sem námskeiðið er haldið og að sögn Reynis Þórs verður það í tali og tónum. „Ég ætla samt ekki að taka lagið,“ segir hann og hlær. - trs