Spánverjar standa ekki við loforðin

Leiðtogar Evrópusambandsins hafa samþykkt að Serbía fái stöðu umsóknarríkis, en Rúmenía og Búlgaría þurfa enn um sinn að bíða eftir því að fá aðild að Schengen-sambandinu.

Endanlegri ákvörðun um greiðslu til Grikklands var frestað fram á fund fjármálaráðherra Evrópusambandsins í næstu viku, þegar samningar um niðurfellingu banka á skuldum gríska ríkisins verða frágengnir.

Þá hafa 25 af 27 ríkjum Evrópusambandsins tekið ákvörðun um stofnun fjármálabandalags, sem á að tryggja aga í fjárlagagerð ríkjanna. Auk Breta ákváðu Tékkar að standa utan við bandalagið.

Þessar ákvarðanir voru teknar á tveggja daga leiðtogafundi Evrópusambandsins í Brussel, sem hófst á fimmtudag og lauk í gær. Á sama tíma bárust hins vegar þær fréttir frá Spáni að fjárlagahallinn þar verði í ár 5,8 prósent, sem er 1,4 prósentustigum hærri spænsk stjórnvöld höfðu lofað Evrópusambandinu.

„Ég ráðgaðist ekkert við leiðtoga Evrópusambandsins en mun tilkynna framkvæmdastjórninni þetta í apríl,“ sagði Mariano Rajoy, forsætisráðherra Spánar. „Þetta er fullveldisákvörðun af hálfu Spánar.“

Hann sagði reyndar stefnt að koma fjárlagahallanum niður í þrjú prósent á næsta ári, sem verður þá í samræmi við áætlun Evrópusambandsins. Hann vildi jafnframt fullvissa alla um að hann stæði eftir sem áður við áform um strangt aðhald í ríkisfjármálum.

Spánverjar höfðu óskað eftir því við Evrópusambandið að mega fara eitthvað yfir 4,4 prósenta halla, en fengu ekki jákvæð svör.

Leiðtogar Evrópusambandsins lögðu áherslu á það í gær að nú þegar fjármálabandalagið er orðið að veruleika og nokkurn veginn búið að ganga frá björgunarpakka handa Grikkjum, þá þurfi að fara að huga af alvöru að því að auka hagvöxt á evrusvæðinu.

Ágreiningurinn við Spán sýnir hins vegar vel þann vanda sem Evrópusambandið stendur frammi fyrir, að þurfa að minnka skuldasúpu evruríkjanna en um leið örva hagvöxtinn til að geta staðið undir niðurgreiðslu þessara sömu skulda.

„Við erum í viðkvæmri stöðu,“ sagði Angela Merkel Þýskalandskanslari. „Kreppan er engan veginn búin.“

gudsteinn@frettabladid.is