Lagið Allt varð hljótt hljómar í Hunger Games

„Það er ekkert leiðinlegt að eiga tónlistina í mynd sem átti þriðju stærstu opnunina í Bandaríkjunum," segir tónlistarmaðurinn Ólafur Arnalds, spurður út í lagið sitt Allt varð hljótt.

Það hljómar í kvikmyndinni The Hunger Games sem hefur farið sigurför um heiminn. Aðeins myndirnar Harry Potter and the Deathly Hallows – Part 2 og The Dark Knight hafa náð í meiri pening á frumsýningarhelgi sinni.

Ólafur, sem hefur nýlokið fjögurra vikna tónleikaferð um Evrópu, kíkti í bíó til að sjá The Hunger Games þegar hann var í Sviss. „Ég var mjög sáttur. Þau fóru vel með lagið og gerðu þetta rosa flott," segir hann. „Myndin kom mér á óvart og það var fullt af lítt þekktri „seventís" tónlist í henni."

Lagið, sem er tekið af plötunni Found Songs, hljómar í ofskynjunaratriði í myndinni þar sem nánast ekkert er talað og fá tónar Ólafs því algjörlega að njóta sín í nánast eina mínútu. „Ég fékk smá sjokk. Lagið kom bara allt í einu því ég vissi ekkert hvar það myndi heyrast. Þau breyttu laginu aðeins og ég var svo mikið að hlusta að ég tók ekkert eftir því hvað gerðist í senunni."

Framleiðendur The Hunger Games höfðu samband við Ólaf á síðustu stundu því sá sem var ráðinn til að semja tónlistina átti í vandræðum með lag fyrir þetta ákveðna atriði. „Ég hafði verið í sambandi við þau áður því ég var í viðræðum um að semja tónlistina við myndina. Þær gengu ekki upp og þau fengu þennan í staðinn."

Aðspurður segist Ólafur hafa fengið „allt í lagi" borgað fyrir lagið. „Ég er ekkert að fara að kaupa mér neinar villur fyrir þetta en þetta kemur sér rosalega vel, sérstaklega fyrst myndinni er að ganga svona vel því þá fæ ég einhver stefgjöld. En þetta er aðallega gott tækifæri fyrir mig."

Ólafur hefur áður unnið við Hollywood-mynd því hann samdi alla tónlistina við Another Happy Day með Demi Moore í aðalhlutverki. Spurður hvort hann verði ekki með í væntanlegum framhaldsmyndum The Hunger Games segist hann vona það. „Ég er búinn að biðja umboðsmanninn minn um að ýta á það."

freyr@frettabladid.is