Vill Hendrix og Gaye líka

Rapparinn og upptökustjórinn Dr. Dre er afar stoltur af því að hafa ásamt Snoop Dogg látið heilmynd af hinum sáluga Tupac Shakur stíga á svið á Coachella-hátíðinni. Hann vonast til að aðrir fylgi fordæmi þeirra og vekji goðsagnir á borð við Marvin Gaye og Jimi Hendrix aftur til lífsins. „Vonandi eiga aðrir listamenn eftir að koma sínum uppáhaldstónlistarmönnum upp á svið. Vonandi getum við séð Jimi Hendrix og Marvin Gaye. Við sjáum hvað setur,“ sagði Dre og útilokar ekki að fara með Tupac-heilmyndina á tónleikaferðalag.