Útvarpsmenn á FM957 blása til Eurovision teitis á Akureyri

Útvarpsmennirnir og plötusnúðarnir, Heiðar Austmann og Rikki G munu sjá til þess að Akureyringar missi ekki af þeim tryllingi sem fylgir Eurovision kvöldinu, en þeir félagar verða með hugsanlega síðasta Eurovision teitið sem haldið verður í Sjallanum en sá orðrómur hefur verið á kreiki að breyta eigi Sjallanum í hótel líkt og skemmtistaðnum Nasa í Reykjavík.

„Við fengum hugmynd um að stofna einhverskonar DJ dúett og skemmta landanum," segir Rikki G annar meðlimur plötusnúðadúettsins sem hann stofnaði ásamt Heiðari Austmann á síðasta ári.

Aðspurður um viðtökurnar segir hann þær hafa verið frábærar og þá félaga hafa skemmt á Selfossi, Sauðárkróki, Vestmannaeyjum og fleiri stöðum.

„Þegar við heyrðum að það ætti hugsanlega að loka Sjallanum þá fannst okkur við verða að fá að skemmta þar að minnsta kosti einu sinni, og hvers vegna ekki að vera með kannski síðasta Eurovision partýið sem haldið verður á þessum sögufræga stað. Páll Óskar sér um Reykjavík og við sjáum um Akureyri," segir Rikki G í léttum tón.

„Við látum það hinsvegar alveg vera að taka í míkrafóninn enda ekki beint okkar tebolli, við sjáum um að þeyta skífunum með öllum skemmtilegustu Eurovision smellunum ásamt öllu því heitasta á dansgólfum landsins í dag."

Eurovision tryllingur Heiðars og Rikka verður auðvitað næstkomandi laugardagskvöld og ásamt þeim mun Emmsjé Gauti troða upp en hann er einn af heitari tónlistarmönnum landsins í dag.

Forsala aðgöngumiða er í Imperial Glerártorgi og kostar miðinn aðeins 1000 kr. Miðaverð í hurð er 1500 kr og opnar Sjallinn klukkan 23:00.