Charlies-stúlkur djarfar í væntanlegu myndbandi

„Söguþráðurinn á eftir að koma áhorfendum á óvart," segir Steinunn Camilla sem ásamt þeim Klöru og Ölmu skipa hljómsveitina The Charlies. Stúlkurnar tóku upp fyrsta myndband sitt í Los Angeles á dögunum.

Myndbandið er við lag sveitarinnar Tickin' Like a Bomb og er að finna á mixteipi sem stúlkurnar sendu frá sér í lok seinasta árs.

Myndbandið var bæði tekið upp í stúdíói á vegum Notion Studios, þar sem risar á borð við MTV og Paris Hilton hafa tekið upp myndbönd, og á ströndinni í Malibu.

„Þetta gekk allt eins og í sögu en í myndbandinu má finna sprengjur, svínið Winston, mann í fjötrum, The Charlie's Angels og partí á ströndinni. Einnig bregðum við okkur í gervi slökkviliðsmanns, hermanns og einkaþjóns," segir Steinunn og bætir við að þær hafi fengið til liðs við sig rosalega dansara með danshöfundinn Jennifer Nappi í fararbroddi.

Stúlkurnar hafa komið sér vel fyrir í Los Angeles þar sem þær vinna að því að koma tónlist sinni á framfæri og er myndbandið liður í því ferli. Myndbandinu var leikstýrt af Raphael Chatelain en fjöldi manna kom að tökunum og greinilegt að öllu var tjaldað til.

„Við erum mjög heppnar með samstarfsfólk, hár- og förðunarfólk, stílista og dansara, sem unnu linnulaust í þrjár vikur við að undirbúa tökur," segir Steinunn en tökur stóðu yfir í tvo daga.

„Við enduðum á að keyra Pacific-þjóðveginn alla leið til Malibu þar sem við tókum upp senur á ströndinni fram eftir kvöldi en þar fengum við til dæmis til afnota 1964 árgerð af Ford Mustang," segir Steinunn.

Myndbandið verður frumsýnt innan skamms en þangað til er hægt að hlusta á og hala niður laginu Tickin' Like a Bomb á vefsíðu sveitarinnar thecharliesofficial.com.

alfrun@frettabladid.is