Britney vill snakk, Snickers og kók

Söngkonan Britney Spears hefur verið ráðin sem dómari í sjónvarpsþættinum X-Factor ásamt Disney-stjörnunni Demi Lovato. Look Magazine birti nýverið óskalista Spears sem er heldur hógvær í óskum miðað við stórstjörnu.

Meðal þess sem Spears vill hafa í búningsherbergi sínu er Diet Coke, snakk, kjúklingabitar, kartöflusalat og tólf Snickers súkkulaðistykki. Að auki vill söngkonan afskorin blóm í vasa, sinn eigin snyrtifræðing og nuddara.

Auðsætt er að ekki mun væsa um Spears á milli þess sem hún dæmir hæfileika Bandaríkjamanna.