Umfjöllun, viðtöl og einkunnir: Stjarnan 3-2 Valur

Stjarnan vann fínan sigur á Val í 7. umferð Pepsí-deildar karla í kvöld. Þetta var fyrsti heimsigur Stjörnunnar á tímabilinu en öll mörk leiksins komu í fyrri hálfleik.

Stjarnan komst yfir strax á 7. mínútu með fínu skallamarki frá Alexander Scholz. Valsmenn náðu að jafna aðeins 6 mínútum síðar er Tryggvi Bjarnason varð fyrir því óláni að stanga boltann í eigið net eftir fyrirgjöf Rúnar Más Sigurjónssonar.

Heimamenn fengu vítaspyrnu á 17. mínútu. Halldór Orri Björnsson ein öruggasta vítaskytta landsins lét Ásgeir Þór Magnússon sem stóð í marki Vals í stað Sindra Snæs Jenssonar verja frá sér.

Tryggvi bætti fyrir sjálfsmarkið og kom Stjörnunni aftur í forystu um miðjan fyrri hálfleik með skalla eftir fína hornspyrnu Mads Laudup.

Alexander Scholz bætti svo við þriðja marki Stjörnunnar á 41. mínútu eftir mikinn darraðadans í vítateig Vals. Valsmenn gáfust þó ekki upp og náðu að minna muninn fyrir hlé þegar Guðjón Pétur Lýðsson skoraði af harðfylgi eftir langt innkast.

Síðari hálfleikur var ekki alveg jafn fjörugur og sá fyrri. Valsmenn voru meira með boltann og sköpuðu sér nokkur ágætis marktækifæri. Vörn Stjörnunnar með Tryggva í fararbroddi náði þó að halda markinu hreinu. Ingvar Jónsson stóð einnig vaktina vel í markinu og varði allt sem á markið kom í síðari hálfleiknum.

Stjarnan er eftir sigurinn í kvöld komin upp í 4. sæti deildarinnar og ætlar greinilega að selja sig dýrt í sumar og vera með í toppbaráttunni.

Valsmenn náðu ekki að fylgja eftir góðum sigri á Keflavík í síðustu umferð og söknuðu greinilega Sindra Snæs sem hafði varið mark þeirra í fyrstu 6 umferðunum.

Daníel Laxdal: Tileinkum konu Tryggva Bjarna sigurinnDaníel Laxdal var sigurreifur í leikslok.

„Loksins náum við að halda út leik sem við erum að leiða,“ sagði Daníel sem átti ágætan leik í vörn heimamanna.

„Þetta var líka leikur uppá það hvort við ætlum að vera í toppbaráttunni eða í miðjumoði eins og við höfum oft verið í. Ég vill svo koma því á framfæri að þessi sigur er fyrir konuna hans Tryggva Bjarna sem á afmæli í dag,“ sagði hinn geðþekki fyrirliði Stjörnunnar.

Bjarni Jó: Búin að vera erfið vikaBjarni Jóhannsson þjálfari Stjörnunnar var í skýjunum með sigur sinna manna á Val í kvöld.

„Þetta var þrautinni þyngri sigur og það hefur tekið okkur tíma að venjast þessu nýja grasi sem er miklu betra en það gamla sem var löngu orðið handónýtt. Það er búið að vera mikið vesen á okkur í vikunni bæði meiðsla og veikindalega séð. Ég tók sénsinn á nokkrum mönnum hér í kvöld og þess vegna vorum við kannski orðnir ansi þreyttir hérna í lokin.“

Bjarni hrósaði Kenni Chopart í leikslok.

„Hann er samanrekinn og sterkur og mér fannst hann standa sig vel í dag.“ A

Aðspurður hvort Stjarnan ætlaði sér ekki að vera í toppbaráttunni í sumar sagði Bjarni.

„Við stilltum þessum leik þannig upp að með sigri gætum við stimplað okkur inn í toppbaráttuna.

Kristján Guðmunds: Fjörugur og skemmtilegur leikur„Mér fannst þetta mjög fjörugur leikur það var allt upp í loft. Ásgeir hélt okkur inní leiknum með því að verja vítið og seinni hálfleik sköpuðum við okkur fullt af færum sem við náðum því miður ekki að nýta.“

Ásgeir Þór Magnússon var í marki Vals í stað Sindra Snæs Jenssonar en ástæðuna fyrir því sagði Kristján vera smávægileg meiðsl.

Varðandi skiptinguna á Rúnari Má sem hafði verið sprækur sagði Kristján.

„Við vorum í 18 tíma ferðalagi norður í bikar fyrir viku og hann fór  til Noregs daginn eftir og spilaði þar á gervigrasi. Við ætluðum að taka hann fyrr útaf því við verðum að passa uppá menn í svona álagi því næsti leikur er strax á miðvikudaginn.“